Dregur úr umferðaröryggi

"Dregið hefur úr umferðaröryggi á Íslandi," sagði Sturla Böðvarsson samgönguráðherra á Umferðaþingi í gær. Sturla sagði enn fremur að stefna samgönguráðuneytisins væri skýr; umferðaröryggisáætlun yrði fylgt fast eftir með auknum fjármunum á næsta ári og rannsóknir á umferðarslysum verða auknar. Birgir Hákonarson, framkvæmdastjóri umferðaröryggissviðs, sagði í erindi að auglýsingaherferð Umferðarstofu þar sem reynt er að hafa áhrif á hegðan ökumanna og auka umferðaröryggi hafi fengið næst hæstu einkunn sem auglýsingaherferð hefur nokkurn tímann fengið hér á landi. Í Gallupkönnun fékk auglýsingaherferðin "Ef þú bara...", sem sýnd var á síðasta ári, ágætiseinkunn 68,9 prósent þeirra sem tóku þátt í könnuninni. Þá töldu 85,4 prósent að boðskapurinn kæmist til skila og væri árangursríkur. Birgir sagði að lítt skilgreindar og almennar herferðir skili litlum árangri en séu þær skýrt afmarkaðar skila þær árangri.