Létt við heimkomuna

Ekki miklar skemmdir urðu á heimilum á Kleppsvegi af völdum eldsvoðans sem varð þegar endurvinnslustöðin Hringrás brann til kaldra kola á mánudag. Lyktin eftir eiturmettaðan reykinn sat þó í teppum stigaganga og fannst einnig í íbúðunum. Ekki margir snéru heim á fyrstu klukkustund eftir að lögreglan hafði gefið til þess leyfi. Fólkið sem Fréttablaðið hitti var létt. Það hafði gist hjá ættingjum og haft áhyggjur af eigum sínum. Um 600 íbúar urðu að yfirgefa heimili sína í Laugarneshverfinu vegna eiturgufanna í fyrra kvöld. Helgi Unnar Valgeirsson, kona hans Sigríður Elín og sonur yfirgáfu íbúðina sína upp úr ellefu í gærkvöldi. Þau töldu ekki ráðlegt að hafa soninn í íbúðinni vegna lyktarinnar og reyksins þar sem hann þjáist af astma. Þá eiga þau von á sínu öðru barni og vænta þess á laugardag: "Við vorum að kaupa íbúðina og erum nýbúin að mála hana alla. Ég hef verið að flísaleggja og gera allt klár. Barnið að koma á laugardaginn og þá gerist þetta," segir Helgi sem hefur staðið í undirbúningi fyrir fjölgun í fjölskyldunni síðasta mánuðinn: "Allt var tilbúið en nú liggur brækjan um íbúðina. Barnafötin nýþvegin voru komin á sinn stað, en nú þurfum við að taka allt í gegn aftur." Stofan í íbúðinni snýr frá sjónum þar sem reykinn lagði að húsinu. Hún var lokuð og mátti finna mikinn mun á lyktinni þar inni og miðað við þann hluta íbúðarinnar sem mæddi helst á. Helgi sagðist óviss um hvernær fjölskyldan gisti aftur í íbúðinni. Þau vildu vera viss og hafa varann á vegna astma sonarins og ástands konunnar. Anna Guðmundsdóttir og maður hennar Gunnar Guðmannsson voru nýkomin heim frá dóttur sinn í Kópavogi sem þau gistu hjá: "Við lokuðum gluggum snemma og biðum þar til lögreglan kom og bankaði," segir Anna. Henni hafi verið orðið órótt og viljað komast heim sem fyrst að skoða aðstæðurnar. "Það er ekki mikið í fötum og allt virðist í lagi. Það var aðeins lykt á ganginum en ekkert inni í stofu eða svefnherbergi þannig að við sleppum vel þó við séum svona nálægt eldsupptökunum." Anna og Gunnar eiga fimm uppkomin börn. Gunnar sat við símann og greindi frá því að allt hefði farið vel. Anna taldi þau hjónin heppin. Það hafi farið um hana þar sem þau hafi ekki haft innbústryggingar. Aðalheiður Hauksdóttir og barnabarn hennar Aron Freyr voru í eftirlitsferð um íbúð foreldra hennar við Klapparstíg sem voru erlendis. "Þau eru búin að vera á línunni og hringdu strax niður í Rauða kross-hús til að tilkynna sig. Ég hafði búið mig undir það versta, að allt yrði svart, en íbúðin virðist í lagi," segir Aðalheiður. Hún búi við Granda og hafi fundið lyktina sem lagði yfir bæinn í fyrrakvöld. Hún segir foreldra hennar hafa verið áhyggjufulla en prísaði sig sæla fyrir að ekki fór verr.