Yfirdráttarlán á niðurleið

Yfirdráttarlán heimilanna hafa minnkað eftir að bankarnir fóru að bjóða íbúðalán í ágúst síðastliðnum. Yfirdráttarlánin voru 60,5 milljarðar í ágúst, þegar bankarnir hófu að bjóða verðtryggð íbúðarlán, en voru komin í 57,8 í lok október. Á sama tíma hafa verðtryggð útlán bankanna til heimilanna aukist úr 93 milljörðum í 129,8 milljarða. Í morgunkorni Íslandsbanka segir hugsanlegt að heimilin hafi nýtt það tækifæri sem hin nýju íbúðarlán bjóða til að skuldbreyta skammtímalánum yfir í langtímalán. Mest hafi breytingin hins vegar orðið úr lánum hjá Íbúðarlánasjóði yfir í lán hjá bönkunum. Samsetning skulda heimilanna hefur tekið enn frekari breytingum því hin nýju íbúðalán bankanna í erlendri mynt hafa verið vinsæl, þau voru 7,5 milljarðar í ársbyrjun en eru nú 23,5. Þau hafa því aukist um heila sextán milljarða. Í heild hafa verðtryggð lán og gengisbundin, sem bæði eru íbúðarlán að mestu, aukist um 51 milljarð frá áramótum og þar af mest síðustu þrjá mánuði.