Telur gerðardóm betri leið

Sigurður Haukur Gíslason, grunnskólakennari í Snælandsskóla í Kópavogi, segir ólíklegt að kennarar geti sætt sig við nýundirritaðan kjarasamning forystu þeirra og launanefndar sveitarfélaganna. Þrjú prósent skilji samninginn og fellda miðlunartillögu ríkissáttasemjara að. Niðurstaða gerðardóms gæti ekki orðið verri. Gunnlaugur Ástgeirsson, fyrrum stjórnarmaður Félags framhaldsskólakennara og verkfallsstjórnar þeirra í verkföllum 1995 og 2000 til 2001, segir söguna og reynsluna sýna að niðurstaða gerðardóms gæti orðið mun verri en nýgerður samningur. "Færi deilan fyrir kjaradóm væri það frá mínu sjónarmiði um það bil það langversta sem gæti komið fyrir. Þó að með almennum hætti sé gert ráð fyrir að dómurinn eigi að vera sanngjarn þá hefur hann aldrei verið það gagnvart þessum hópum," segir Gunnlaugur. Sigurður segir lítið hafa verið skoðað hvað fari í vasa kennara. Umræðan snúist nær eingöngu um kostnaðarauka sveitarfélaganna. Engin rauð strik séu í samningnum og verði verðbólgan fjögur til fimm prósent hafi kennarar enga leið út. "Ef einhver ætlar að tryggja að verðbólgan fari ekki upp fyrir þrjú prósent skal ég viðurkenna að samningurinn er kjarabót fyrir kennara," segir Sigurður, sem gagnrýnir að yfirvinna sé talin launahækkun. Samningsstaða kennara við næstu viðræður verði slæm samþykki þeir samninginn. Gunnlaugur segir verðbólgustigið ekki breytast þótt kennarar felli þennan samning. Ef stjórnvöld hleypi verðbólgunni upp séu forsendur breyttar: "Verði samningurinn samþykktur gera menn það á þeim grundvelli að það sé skárra en að fara fyrir gerðardóm. Það segir ekkert um ánægju með samninginn eða að menn telji að þeir séu að fá laun eins og þeim beri." Gunnlaugur segir ástæðu þess að sveitarfélögin hafi ekki samið einfalda: "Þau hafa vitað að þau yrðu skorin niður úr þessari snöru."