Hægrisveifla borgarstjórnar

Skattahækkun í Reykjavík - Guðvarður Jónsson Hin háttvirta borgarstjórn Reykjavíkur ákvað að taka eina netta hægrisveiflu, fara að dæmi ríkisstjórnar og hækka skatta án tillits til þess hvernig slíkt bitnaði á þeim er lægstan hafa lífeyrir. Tilkynning borgarstjórnar hljóðaði upp á fasteignaskattshækkun um 15.000 kr. á ári fyrir þann er ætti íbúð að verðmæti um 10 milljónir kr. og væri með tekjur um þrjár milljónir á ári. Ég veit nú ekki hvaða hænsnakofi það er í Reykjavík sem ekki hefur tekist að hækka nema upp í 10 milljónir. Ef við lítum svo á hækkun ellilífeyris á þessu ári, samkvæmt útborgunarseðlum, þá hefur lífeyrir frá Framsýn og Reykjavíkurborg hækkað um rúmar 10 þú. kr. samanlagt, það sem af er árinu, útborgaðar tæpar 7 þús. kr. eftir skatta, en lífeyrir frá Tryggingarstofnun hefur ekki hækkað um eina krónu. Á þessu sér maður best hversu rífleg kaupmáttaraukningin er sem ríkisstjórnin stendur fyrir. Rétt er svo að hafa það í huga að útborgaður ellilífeyrir er innan við eina milljón á ári. Það er því nokkuð ljóst að ellilífeyrisþegi, er býr í eigin íbúð, sem er stærri en hænsnakofi, verður fyrir verulegri skerðingu á lífeyri með þessari hækkun á fasteignasköttum, þar sem hann mun þurfa að taka á sig allar aðrar hækkanir á næsta ári, óbættar.