Aðgerðum ekki lokið í Fallujah

Bandarískar hersveitir kljást enn við síðustu skæruliðana í borginni Fallujah, að sögn talsmanna hersins, þó að íröksk yfirvöld hafi í gær lýst því yfir að aðgerðum í borginni væri lokið. Andspyrnan við hersetuliðið fer vaxandi í norðurhluta landsins. Talsmenn Bandaríkjahers fullyrða að krafturinn í skæruliðum í Fallujah fari þverrandi, enda er hermt að þúsund skæruliðar hafi verið felldir og tvöhundruð handteknir. Ríkisstjórn Íraks sendi í gærkvöldi frá sér yfirlýsingu þess efnis, að aðgerðum í borginni væri lokið. Í morgun hefur þó sprengjum verið varpað á skotmörk í borginni. Átökin koma í veg fyrir að sendisveitir rauða hálfmánans komist inn í borgina með neyðarbirgðir, og talsmaður samtakanna segir mannlegan harmleik yfirvofandi þar. Íbúi í Fallujah, sem Reuters-fréttaþjónustan ræddi við, sagði fjölskyldu sína mjög illa haldna sökum vatns- og matarskorts. Öll börnin sín væru með niðurgang og veik. Í norðurhluta Íraks virðist andspyrna við bandarískar og írakskar hersveitir fara vaxandi. Mósúl var í gær sögð á valdi uppreisnarmanna, en bandarískur hershöfðingi fullyrðir að hún sé á ný í höndum yfirvalda og herliðs. Hann kvaðst þó hafa af því áhyggjur, að uppreisnarmenn stálu skotheldum vestum, skotfærum og lögreglubúningum af nokkrum lögreglustöðvum í borginni. Í Bakúba er barist, og fregnir af skærum hafa borist frá Howeidscha. Lögreglumaður var skotinn til bana í Samarra og í Kirkúk var kveikt í olíuleiðslu.