Dregin af dönskum skandal

Tillaga viðskiptaráðuneytis um að heimildir hlutafélaga til að hafa starfandi stjórnarformunn verði þrengdar gengur þvert á þróun annars staðar um stjórnarhætti hlutafélaga að mati Lögmanna Mörkinni sem unnu skýrslu um þessar tillögur fyrir KB banka. Lögmennirnir segja slíka reglu einungis að finna í Danmörku og Þýskalandi af þeim sjö löndum sem skoðuð voru. Í Noregi, Svíþjóð, Bretlandi, Frakklandi og Sviss sé slík löggjöf ekki til staðar. Lögmönnunum Gunnari Jónssyni, Gesti Jónssyni, Herði Felix Harðarsyni og Ragnari Hall var falið að fara yfir skýrslu nefndar viðskiptaráðherra um íslenskt viðskiptaumhverfi og skoða þá þætti sem lúta að því sem kallað hefur verið starfandi stjórnarformenn. "Almennt á ekki að leiða í lög reglur nema að menn séu búnir að mynda sér skoðun um að það sé nauðsynlegt að ná einhverjum markmiðum," segir Gunnar Jónsson, aðalhöfundur skýrslunnar. Hann segir að fyrst verði að meta hvort vandamál sé uppi og síðan að bregðast við komist menn að þeirri niðurstöðu. "Þetta er úr takti við okkar lagahefð sem er sú að við búum til ramma og reynum sem allra minnst að leiða í lög einhverjar reglur sem varða sértilvik." Gunnar segir að geri menn mikið af því þá leiði af því hætta á því að sú ályktun sé dregin að það sem ekki sé skilgreint í sértilvikum sé heimilt með vitund og vilja löggjafans. "Þá er verið að afmá línuna sem ramminn dregur." Lögmennirnir segja að tillagan eigi sér fyrirmynd í dönskum lögum. "Ákvæði dönsku laganna sker sig úr fyrir það hversu takmarkandi það er. Ákvæðið kom til sem viðbrögð löggjafans við hneykslismáli í tengslum við tiltekið gjaldþrot og telst því tæpast heppileg fyrirmynd," segir í skýrslu lögmannanna. Gunnar segir að staða stjórnarformanns KB banka stangist ekki á við regluna samkvæmt tillögunni. "Engu að síður er hætta, þótt viðskiptaráðherra hafi sagt að svo sé ekki, á að lögin verði síðar túlkuð með öðrum hætti. Verslunarráð Íslands, Samtök atvinnulífsins og Kauphöll Íslands hafa gefið út leiðbeiningar um stjórnarhætti fyrirtækja. Lögmennirnir telja að tiilögur nefndarinnar drepi niður frumkvæði þessara aðila. Almennt sé slíkum reglum ekki skipað með lögum heldur reglum sem settar eru af kauphöll eða markaðsaðilum. "Til hvers að setja lög gegn því sem hefur gengið vel til þessa?" segir Gunnar.