Kraftmikill hugsjónamaður

Maður vikunnar - Eggert Magnússon formaður KSÍ Mikið hefur mætt á Eggerti Magnússyni síðustu daga vegna undirbúnings knattspyrnulandsleiks Íslands og Ítalíu á miðvikudag. Hann og hans menn hjá Knattspyrnusambandinu settu markið hátt og stefndu á að slá aðsóknarmet að íslenskum knattspyrnuleik sem var sett þegar Valsmenn tóku á móti portúgalska liðinu Benfica í september 1968. 18.194 áhorfendur sáu hvítklædda Valsarana gera markalaust jafntefli gegn hinum heimsfræga Eusebio og félögum og var stemningin á leiknum, að sögn kunnugra, ólýsanleg. Allt bendir til að metið verði slegið á miðvikudag. Eggert Árni Magnússon fæddist 20. febrúar 1947 og varð því 57 ára á árinu. Að loknu hefðbundnu grunnskólanámi fór hann í MR og lauk þaðan námi á skemmri tíma en almennt tíðkaðist og er það til marks um hæfni hans og dugnað. Þaðan lá leiðin í háskóla, fyrst í Noregi þar sem hann nam skipaverkfræði, og síðar í HÍ þar sem viðskiptafræðin varð fyrir valinu. Eggert kenndi við Vélskóla Íslands í nokkur ár, áður en hann sneri sér að viðskiptum. Fyrst var hann framkvæmdastjóri fjölskyldufyrirtækisins Fróns, þá fasteignasölunnar Eignavals, næst glerverksmiðjunnar Esju og kom svo "heim" aftur 10 árum síðar. Frón var selt fyrir nokkrum árum og hefur Eggert helgað sig knattspyrnunni frá þeim tíma utan hvað hann situr í stjórn fjárfestingafélagsins Burðaráss. Raunar var fátt sem minnti á kexframleiðslu á forstjóraskrifstofu hans hjá Fróni, allt var þakið myndum og munum sem tengdust knattspyrnunni. Þá má geta þess að hann sat í stjórn SÁÁ um skeið. Knattspyrnuáhugi Eggerts kom snemma í ljós og ungur hóf hann að æfa með Val. Hann þótti víst aldrei neitt sérlega góður en viljinn bar hann hálfa leið. Eggert lifir afar heilbrigðu líferni og er í góðu líkamlegu formi. Það er af sem áður var þegar hann drakk meira en góðu hófi gegndi og var mikill um sig miðjan, svo ekki sé fastar að orði kveðið. Nú hugar hann vel að mataræðinu. Ennþá leikur hann knattspyrnu, nú með vinum og samstarfsmönnum, og eru hæfileikar hans sagðir hafa aukist með árunum þó að leiknin verði oft útundan á kostnað hörkunnar. "Hann er fauti," varð reyndar einum að orði. Þá hleypur hann sér til heilsubótar og eru vegalengdirnar jafnan mældar í tugum kílómetra í hvert sinn. Fyrir utan knattspyrnuna og hlaupin er laxveiði hans helsta áhugamál. Eggert varð formaður knattspyrnudeildar Vals árið 1984 og gegndi því starfi í fimm ár, þar til hann var kjörinn formaður KSÍ. Um svipað leyti urðu miklar breytingar á knattspyrnunni í Evrópu, áhuginn jókst og peningavæðing íþróttarinnar hófst af alvöru. Það má segja að Eggert hafi verið réttur maður á réttum stað á þessum tíma og kraftur hans og drift gerðu það að verkum að litla Ísland varð þátttakandi í ævintýrinu. Undir hans stjórn hafa rekstur og umsvif Knattspyrnusambandsins aukist til mikilla muna og segja kunnugir að fyrir hans tilstuðlan hafi sambandinu í raun verið breytt í hefðbundið fyrirtæki. Eldhugi, ljúfur og góður, óþolinmóður, drífandi og afkastamikill voru orð sem samferðamenn Eggerts völdu til að lýsa honum. Hann er mikilsvirkur í alþjóðaknattspyrnunni og situr í framkvæmdastjórn Knattspyrnusambands Evrópu. Störf hans á þeim vettvangi kalla á mikil ferðalög, bæði til fundasetu og eins til að horfa á leiki vítt og breitt um álfuna. Hefur hann oft verið valinn til að gegna hlutverki eftirlitsmanns á stórleikjum. Í gegnum þessi störf hefur Eggert eignast marga góða vini innan knattspyrnunnar og er hinn franski Michel Platini þeirra þekktastur. Um eigin knattspyrnuáhuga hefur Eggert sagt að í gegnum fótboltann hafi hann lært mikið um lífið. Hann hefur einnig sagt það forréttindi að fá að lifa og hrærast í greininni og að hann sé þakklátur fyrir að eiga þátt í vexti hennar og viðgangi. Eggert er mikill fjölskyldumaður og ræktar fjölskylduböndin af alúð og natni. Hann er kvæntur Guðlaugu Nönnu Ólafsdóttur og eiga þau fjögur börn og fjögur barnabörn og er það fimmta á leiðinni. Klæðaburður hans vakti lengi vel athygli en hann er jafnan fínni í tauinu en almennt gerist. Litskrúðug bindi og stórir bindishnútar eru hans einkenni og víðfræg um knattspyrnuheiminn.