Þriggja hæða herleg terta

Bræðurnir Gunnar Jökull og Kjartan Tindur Gunnarssynir eiga afmæli með fárra daga millibili. Yfirleitt er haldið upp á þau með einni stórri sameiginlegri veislu og þar sem þau eru að sumarlagi er stundum hægt að halda hana úti í garði. Þannig var það á dögunum. Þá fagnaði Gunnar Jökull níu ára afmæli og Kjartan Tindur sex ára. Móðirin Sigríður Kjartansdóttir bakaði herlega þriggja hæða súkkulaðiköku og skreytti með smartísi. Sigríður var svo góð að gefa okkur uppskriftina sem er svohljóðandi. Súkkulaðiterta 750 g smjör 750 g sykur 6 egg 750 g hveiti 6 tsk. lyftiduft 300 g súkkulaðidropar Smörið og sykurinn er hrært vel saman. Eggin eru sett út í eitt í senn, til skiptis við hveitið og lyftiduftið sem hefur verið blandað saman. Súkkulaðinu bætt í hræruna. Deginu er skipt í þrjú smurð form. Bakað í 45 mínútur við 175 gráðu hita. Krem Betty Crocker súkkulaðikrem er búið til og sett á milli botnanna eða lagað súkkulaðikrem eftir eigin uppskrift. Skraut 300 gr dökkt hjúpsúkkulaði 1 dl rjómi Sett í pott og súkkulaðið látið bráðna við vægan hita í rjómanum. Hellt yfir kökuna og hún skreytt að vild.