Sjötíu þúsund mynduðu mótmælakeðju

Um sjötíu þúsund Ísraela tókust í hendur og mynduðu keðju fólks allt frá Gaza til Jerúsalem í gær. Með þessu var fólkið að mótmæla áformum Ariels Sharon forsætisráðherra um að eyðileggja nokkrar landtökubyggðir gyðinga og draga herliðið frá Gaza-svæðinu. Náði óslitin röð mótmælendanna níutíu kílómetra milli landnemabyggðarinnar Gush Katif á Gaza til gamla borgarhlutans í Jerúsalem. Málið er mikið hitamál og sýnir sú mikla þátttaka í mótmælunum hversu djúpur ágreiningurinn er en leiðtogi landnemanna segir að fólk mótmæli því að gyðingar séu reknir burt frá landi sínu. Forseti þingsins var meðal þrjátíu ísraelskra þingmanna, þar af fimmtán úr Likudflokki Sharons sem tóku þátt í mótmælunum. Um átta þúsund landnemar á Gaza búa þar í rúmlega tuttugu víggirtum byggðum og ráða yfir vatnslindum og helmingi alls lands. Á hinum helmingnum búa þrettán hundruð þúsund Palestínumenn. Meirihluti Ísraela styður áætlun Ariels Sharon um að landtökumenn skuli á brott frá Gaza og að innlima í Ísrael stórar landtökubyggðir á Vesturbakka Jórdanar.