Hundrað tilfelli pyntinga

Bandarískir hermenn hafa gerst sekir um að misþyrma föngum í Írak og Afganistan í að minnsta kosti 94 tilfellum síðan haustið 2001. Þetta eru niðurstöður rannsóknar bandaríska hersins sem var gerð eftir að upp komst um stórfelldar misþyrmingar á föngum í Írak í vor. Bandaríska varnarmálaráðuneytið hefur hingað til ekki viljað gefa upp í hversu mörgum tilfellum talið var að föngum hafi verið misþyrmt, en þetta er mun hærri tala en hefur verið gefið í skyn. Rannsóknin er sögð leiða í ljós að misþyrmingarnar hafi ekki verið kerfisbundnar heldur afleiðingar þess að hermenn viðhöfðu ekki eðlileg vinnubrögð. Það er þvert á niðurstöður rannsóknar Rauða krossins í febrúar þar sem sagt var að pyntingum væri beitt kerfisbundið. Þingmaður demókrata í Bandaríkjunum dró fullyrðingar þeirra sem stóðu að skýrslunni í efa og sagði ólíklegt að það væru engin kerfisbundin vandamál við fangagæslu hersins. Um það bil 50 þúsund manns hefur verið haldið föngnum í Afganistan og Írak síðan 2001.