Al-Kaída hótar Evrópuþjóðum

Hryðjuverkamenn úr röðum al-Kaída, sem starfa í Evrópu og fara þar huldu höfði, hafa hótað Búlgaríu og Póllandi árásum, dragi ríkin ekki herlið sitt frá Írak. Hótunin fannst á vefsíðu sem ekki hefur verið notuð af hryðjuverkamönnum áður og hópurinn er óþekktur. Hótunin var undirrituð: „Al-Kaída samtökin í Evrópu.“ Talsmenn samtakanna segja að árásirnar verði sambærilegar þeim sem gerðar voru á New York og Madríd. Hópurinn segist vera í aðstöðu til þess að gera árásir hvenær sem er. Pólski varnarmálaráðherrann, Janusz Zemke segir að pólsk stjórnvöld bíði eftir nánari upplýsingum frá leyniþjónustunni og nágrannaríkjum sínum í Evrópu. Hann segist engar upplýsingar hafa að svo stöddu að hryðjuverkjamenn hyggist gera árásir á pólskar borgir. Í yfirlýsingu frá búlgörskum stjórnvöldum segir einnig að ekkert bendi til þess að hryðjuverkamenn undirbúi árásir í Búlgaríu. 270 búlgarskir hermenn eru í Írak og stjórnvöld segja að þeir fari hvergi.. Þó nokkrar hótanir hafa verið á Internetinu að undanförnu í tengslum við hernámið í Írak en flestar hótanirnar eru taldar vera gabb. Hryðjuverkamaðurinn Abu Musab al-Zargawi, sem tengist al-Kaída, hefur reyndar hótað Japönum árásum dragi þeir ekki her sinn til baka. Um 500 japanskir hermenn eru í Írak. Tvö þúsund Pólverjar eru í Írak en stjórnvöld í Póllandi hafa ákveðið að draga þúsund þeirra út úr landinu og senda þá þess í stað til Afganistans þar sem þeir verða undir stjórn NATO. Óttast er að brotthvarf filippseyska hersins frá Írak hafi virkað sem olía á eldinn í baráttunni við hryðjuverkamenn. Þeir kunni nú að álíta sem svo að hægt sé að sannfæra fleiri ríki um að draga sig út úr Írak.