Vilja meiri vinnu fyrir sömu laun

Starfsmenn Bosch í Frakklandi samþykktu í kosningum að lengja vinnuvikuna um eina klukkustund gegn engri launahækkun. Forsvarsmenn Bosch höfðu hótað uppsögnum. Aðeins tvö prósent starfsmanna í verksmiðjum Bosch höfnuðu hugmyndinni. Fyrirtæki í Frakklandi hafa kvartað sáran undan því að eftir að 35 stunda vinnuvika var lögfest sé erfitt að viðhalda eðlilegri rekstrargetu fyrirtækja. Sífellt þurfi að ráða menn tímabundið og erfitt sé að skipuleggja verkefni fram í tímann. Frönsk vinnulöggjöf frá árinu 2000, sem lögfesti 35 stunda vinnuviku, hefur að undanförnu sætt síaukinni gagnrýni. Hugmyndinni um styttri vinnuviku var ætlað að draga úr atvinnleysi og auðga einkalíf með betri tíma. Hins vegar hefur framleiðni á hvern starfsmenn lækkað verulega með þeim afleiðingum að frönsk fyrirtæki eiga erfitt með að halda samkeppnishæfni sinni. Talið er að ákvörðun starfsmanna Bosch kunni að hafa þau áhrif að fleiri fyrirtæki grípi til aðgerða til að komast hjá atvinnulöggjöfinni og að hugsanlega þurfi frönsk stjórnvöld að bregðast við með því að afnema lögin um hina stuttu vinnuviku.