Hóta að segja sig úr ráðinu

Japanir hóta að segja sig úr Alþjóðahvalveiðiráðinu verði banni við hvalveiðum í atvinnuskyni ekki aflétt. Þeir segjast ennfremur ætla að auka vísindaveiðar sínar til muna. Líkur hafa aukist á að hvalveiðar í atvinnuskyni verði leyfðar á ný, eftir átján ára bann. Formaður Alþjóða hvalveiðiráðsins ætlar að leggja þetta til á ársfundi Alþjóðahvalveiðiráðsins sem hófst í morgun, en ekki er þó gert ráð fyrir að tillagan verði samþykkt, í ár að minnsta kosti. Japanir segjast hinsvegar vera að missa þolinmæðina, og tilkynntu við upphaf fundarins í morgun, að þeir ætluðu ekki einasta að auka vísindaveiðar sínar á hrefnu á næstunni, heldur segja sig úr hvalveiðiráðinu ef banninu verður ekki aflétt í síðasta lagi á næsta ársfundi. Hvalverndunarsinnar eru farnir að hafa af því áhyggjur að hvalveiðiþjóðum hafi tekist að vinna nógu marga á sitt band. Umræðan um atvinnuveiðarnar hefst hinsvegar ekki fyrr en á morgun, þegar tillaga formannsins verður kynnt.