Besta vopnið gegn alnæmi

Skírlífi og virðing fyrir hjónabandinu er besta vopnið í baráttunni gegn alnæmi - ekki smokkurinn, sagði forseti Úganda á ráðstefnu um alnæmi í dag. Orð hans ollu undrun meðal ráðstefnugesta enda sýnir reynslan annað. Frá því að alnæmisveiran var fyrst greind á 9. áratug síðustu aldar hafa um tuttugu milljónir manna látist af völdum alnæmis. Þar sem barist hefur verið fyrir notkun smokksins hefur hvað mestur árangur náðst í að lækka tíðni nýsmita. Forseti Úganda, Yoweri Museveni sem hefur náð góðum árangri í fækkun HIV smita í eigin landi, kom flestum á óvart með því að segja á ráðstefnu um alnæmi í dag að smokkurinn væri ekki besta vopnið heldur skírlífi og virðing í hjónanbandinu. Þessi ummæli eru á sömu línu og George Bush, forseti Bandaríkjanna, hefur látið falla en stjórn hans styður skírlífi ungs fólks frekar en notkun smokksins. Þetta telja margir mistök enda hefur reynslan, t.d. í Tælandi, þegar sýnt annað með óyggjandi hætti. Barbara Lee, þingmaður á Bandaríkjaþingi, segir fimm milljónir manna smitast á ári hverju af alnæmi og að konur og stúlkur eigi ekki kost á því að halda sig frá kynlífi. Hún segir það ekki aðeins óábyrgt að hrinda af stað áætlun sem gengur út á að konur haldi sig frá frá kynlífi fram að hjónabandi heldur sé slíkt einnig ómannúðlegt.