Ofmátu vopnabúnað stórlega

Leyniþjónustan CIA veitti rangar upplýsingar í aðdraganda Íraksstríðsins. Þetta er niðurstaða bandarískrar þingnefndar sem kannað hefur forsendur stríðsins. Skýrsla rannsóknarnefndar Bandaríkjaþings er harðorð í garð sérfræðinga CIA, en nefndin segir hálfgerða múgæsingu hafa leitt til þess, að kolrangar upplýsingar voru kynntar sem blákaldar staðreyndir og vafasamar ályktanir dregnar. Að mati nefndarmanna náði þessi hóphugsun, eins og þeir kalla það, til leyniþjónustna allra þjóða sem tóku þátt í stríðsrekstrinum. Því hafi allir komist meira og minna að sömu, röngu niðurstöðunum. Pat Roberts, formaður rannsóknarnefndarinnar, sagði að nú vissu þeir að þessar ályktanir hefðu verið rangar, óskynsamlegar og byggðust að mjög takmörkuðu leiti á fyrirliggjandi upplýsingum. Reynt sé að skýra út í skýrslu nefndarinnar hvernig þetta gat farið svona. Jay Rockefeller, varaformaður rannsóknarnefndarinnar, sagði engan vafa leika á því að mistökin sem voru gerð fyrir innrásina í Írak væru á meðal alvarlegustu upplýsingabresta í sögu bandarísku þjóðarinnar. Það væri staðreynd að ríkisstjórnin á öllum stjórnsýslustigum hafi notaði vafasamar upplýsingar til að færa rök fyrir stríði. Hann sagði að þingið hefði aldrei heimilað þetta stríð með 76 atkvæða mun ef þingmenn hefðu vitað þá það sem nú liggur fyrir. Rockefeller sagði einnig að fyrir vikið hefði trúverðugleiki Bandaríkjanna beðið hnekki og stríðið leitt til djúpstæðs haturs meðal múslíma. Við annan tón kvað hjá Bush forseta sem sagði að allir hefðu haldið að vopnabúr myndu finnast í Írak. Saddam hefði haft burði til að framleiða vopn og vitað var að hann hatar Bandaríkin