Ákvað 14 ára að gerast Snigill

Ég ákvað þegar ég var 14 ára og las grein um stofnun Sniglanna að verða Snigill þegar ég yrði stór. Ég byrjaði strax að pæla í því sem stóð í greininni að ná þyrfti 13 undirskriftum til að komast í hópinn," segir Dagrún Jónsdóttir en hún hefur verið í Sniglunum í 13 ár. Um þessar myndir eiga samtökin 20 ára afmæli og segir Dagrún tímamótanna minnst með ýmsum hætti. "Við héldum veglega sýningu í vor, vorum með dagskrá 1. maí og nú um helgina höldum við landsmót í Húnaveri." Dagný segir ekki aftur snúið eftir að gengið er í félagsskapinn. "Þetta heltekur flesta sem byrja. Jafnvel þó að fólk taki sér frí í einhvern tíma þá snýr það aftur að lokum." Þegar Dagrún byrjaði 20 ára gömul voru konurnar ekki margar en hún segir að þeim fari sífellt fjölgandi. Sniglarnir halda mikið hópinn, skemmta sér og hjóla saman. "Við tökum upp á ýmsu, höldum árshátíðir, jólaböll, landsmót og förum í ferðalög. Eins höfum við barist fyrir réttindum bifhjólafólks á Íslandi og unnið að öryggismálum." Sjálf er Dagrún forfallinn áhugamaður um Harley Davidson og er dugleg að taka við skemmdum mótorhjólum til að gera upp. "Ég á elsta ökufæra mótorhjólið á landinu, 1931 árgerð af Harley. Ég starfræki líka Vélhjólaklúbb gamlingja en inngönguskilyrðið í hann er að eiga mótorhjól sem er 25 ára eða eldra," segir Dagrún og bætir því við að hún sé einræðisherra í þeim 40 manna hóp. Meðalaldur Sniglanna er sífellt að hækka og segir Dagrún ástæðuna fyrir því vera margþætta. "Tryggingarnar eru of dýrar fyrir ungt fólk og eins er þetta tískufyrirbrigði hjá eldra fólki að keyra um á mótorhjóli. Við erum síðan alltaf að eldast." Dagrún segir ofurtöffarastimpilinn nánast vera farinn af mótorhjólafólki á Íslandi og segir hún það hafa verið nauðsynlegt á sínum tíma. "Fyrstu árin var aðallega ungt fólk í Sniglunum og það var hrikalegur töffaraskapur í gangi. Við þurftum hins vegar að laga ímyndina þegar við fórum að vinna í auknu mæli að umferðarátökum og með hinu opinbera. Nú erum við hálfgerð englasamtök." Afmælislandsmót Sniglanna verður nú um helgina í Húnaveri og verður blásið til þriggja dansleikja. Dagskráin hefst í kvöld og mun standa næstu þrjá daga. Fjórar hljómsveitir skemmta næstu kvöld, KFUM and the andskotans, Sniglabandið, Exitst og Dark Harvent.