Mánar endurtóku stríðsmótmælin

"Þetta var miklu skemmtilegra en okkur óraði fyrir," segir Björn Þórarinsson hljómsveitarmeðlimur Mána en hljómsveitin vakti mikla athygli í síðustu viku þegar hún hitaði upp fyrir Deep Purple í Laugardalshöll. "Þarna var fullt af ungum krökkum sem vissu ekkert um okkur því tónlistin okkar hefur ekkert verið í spilun undanfarið og þegar við fundum að þau voru að fíla lögin og upplifðum fagnaðarlætin í salnum varð okkur verulega skemmt." Á sviðinu með Mánum var að finna næstu kynslóð tónlistarmanna innan um hljómsveitarmeðlimi. "Labbi stakk upp á því að við fengjum börnin okkar, sem hafa menntað sig í tónlist, með okkur í lið til að þétta bakraddavegginn og ryþmann í tónlistinni," segir Björn og á tónleikunum spilaði Unnur Birna Björnsdóttir á fiðlu, Björn S. Ólafsson á slagverk og djasssöngkonan Guðlaug Dröfn Ólafsdóttir söng með. "Þau slóu ekki feilnótu og það var sérstaklega gaman að upplifa endurkomuna með þeim. Unnur Birna spilaði til dæmis á fiðluna upphafsstefið í þjóðsöng þriggja þjóða í laginu Þriðja heimsstyrjöldin. Það voru kannski ekki allir sem föttuðu pælinguna en þetta voru lög þeirra þjóða sem studdu stríðið í Írak og þarna hljómaði bandaríski, breski og íslenski þjóðsöngurinn." Bassi segir gamla uppreisnarandann hafa komið upp í Mánum aftur. "Þegar við spiluðum lagið fyrir 30 árum vorum við að mótmæla Víetnamstríðinu og undir trommusurgi sem táknaði styrjöldina spiluðum við stubba úr þjóðsöngvum. Nú eftir þátttöku Íslendinga í stríðinu vorum við í rauninni að endurtaka áróðurinn og vorum með alvöru stríðshljóð, hljóð úr þyrlum og vélbyssum og þjóðsöngvana sem hljómuðu yfir." Mánar slógu í gegn í Laugardalshöll og aðdáendur bíða eftir því að fá að heyra í þeim aftur. "Krakkarnir okkar hafa verið að skoða blogg á netinu og þar er mikið verið að spyrja um hvenær næstu tónleikar Mána verða. Þetta kitlar okkur svolítið en ofan á allt saman þá fagnar hljómsveitin fjörutíu ára afmæli sínu á næsta ári. Við erum að velta fyrir okkur með hvaða hætti væri gaman að gera þetta og munum án efa koma saman aftur." tora@frettabladid.is