Nýtur hverrar mínútu með Madonnu

Sekkjapípuleikarinn Lorne Cousin nýtur lífsins þessa dagana því hann er staddur á tónleikaferð með Madonnu sem stendur yfir í fimm mánuði. Cousin, sem er 31 árs, var að vinna sem lögfræðingur í Edinborg þegar Madonna hafði samband við hann og bað hann um að spila í tónleikaferðinni. Söngkonan hafði heyrt í honum í brúðkaupi vinkonu sinnar, Stellu McCartney, á síðasta ári og ákvað að fá hann með í túrinn. Að sögn föður hans, Alastair, nýtur Cousin hverrar mínútu í tónleikaferðinni enda uppi á sviði með einni vinsælustu söngkonu veraldar. "Ég talaði við hann fyrir nokkrum dögum og hann virtist hafa mjög gaman af tónleikaferðinni. Hann hefur aldrei skemmt sér eins vel og honum semur vel við Madonnu," sagði hann. Cousin mun spila með Madonnu á ferð hennar um Bandaríkin og Kanada til loka júlí en fer þá í tíu daga frí. Eftir það mætir hann aftur til leiks og spilar með söngkonunni víðs vegar um Evrópu.