Spilar með Dido og Phil Collins

"Ég er nýkominn heim frá LA þar sem ég skaut af byssu í fyrsta skipti í The LA Gun Club. Það var mjög gaman og nú skil ég Phil Spector betur en áður," segir Barði Jóhannson í Bang Gang en hljómsveitinni hefur verið boðið að koma fram á Arezzo wave tónlistarhátíðinni á Ítalíu þann 8. júlí næstkomandi. Hátíðin er mjög stór og það segir sitt að í fyrra sóttu hana um 200.000 manns. Bang Gang mun leika á aðalsviðinu og verður ekki með ómerkari hljómsveitum en Cypress Hill og Black Rebel Motorcycle Club. Barði segist ekki hafa spilað mikið á festivölum en segir þó að sér líki það ágætlega. "Hingað til hafa þetta bara verið lítil festivöl með nokkrum böndum en það hefur verið mjög gaman." Viku seinna eða 14. júlí verður Bang Gang svo á einni elstu og virtustu hátíð í Evrópu, Montreaux Jazz Festival í Sviss, þar sem hljómsveitin spilar í Miles Davis Hall ásamt strengjakvartett úr Sinfóníuhljómsveit Íslands. Meðal annarra listamanna sem verða á hátíðinni í ár eru Dido, Korn, Alicia Keys, Sean Paul, Air, B.B. King, Herbie Hancock, Phil Collins og fleiri. Hitt er annars að frétta af Bang Gang að hljómsveitin er nýkomin af tónlistarhátíðinn Les Nouts Botanique í Brussel þar sem hún spilaði með hljómsveitunum Divine Comedy og The High Llamas í Cirque Royal sem er gamalt leikhús byggt fyrir sitjandi gesti. Lag hljómsveitarinnar, Stop in the name of love, hefur verið vinsælt í Evrópu og komst meðal annars á topp MTV í Ítalíu og platan Something Wrong hefur selst vonum framar. Barði segir að það sé ekki ráðgert að spila á Íslandi í náinni framtíð. "Kannski í ágúst, mig hefur lengi langað til að spila út á landi, taka svona fimm staða túr. Annars er ég núna á fullu við að semja músík við sænska bíómynd frá 1920 sem nefnist Haxan en ég mun svo spila undir myndinni í París næsta laugardag og þeyta skífum í partýi eftir á."