Á þing í skólabúningi?

Angus Young, gítarleikarinn í skólabúningnum sem þeytist sviðsenda á milli með rokksveitinni AC/DC, hefur tilkynnt framboð sitt til þings fyrir stjórnarandstöðuna í Ástralíu. Ákvörðunin kemur töluvert á óvart því AC/DC hefur hingað til verið allt annað en pólitísk hljómsveit. Þar hefur léttleikinn verið í fyrirrúmi og oftar en ekki sungið um partístand, drykkju og föngulegar stúlkur. Forsætisráðherra Ástralíu, John Howard, er þess fullviss að Angus muni nýtast vel. "Hann og AC/DC hafa sparkað duglega í afturendann á Midnight Oil hingað til og ég sé það ekki breytast héðan í frá," sagði ráðherrann og skaut þar með rækilega á Peter Garrett, forsprakka áströlsku sveitarinnar Midnight Oil, sem býður sig fram á þing fyrir Íhaldsflokkinn. "Hann er hátt gíraður og kraftmikill einstaklingur og leið hans mun liggja hratt upp á við," fullyrti John Howard enn fremur. Young á sér stóran hóp aðdáenda í Ástralíu og þykir því sigurviss í komandi kosningum. Viðbrögð AC/DC-unnenda við uppátæki gítarleikarans hafa verið blendin.