Banamein Arafats upplýst?

Það ætti jafnvel að liggja fyrir í dag hvert banamein Jassers Arafats, fyrrverandi leiðtoga Palestínumanna, var. Sögusagnir hafa verið á kreiki um dánarorsök Arafats og menn hafa velt fyrir sér hvort eitrað hafi verið fyrir honum. Frændi leiðtogans er væntanlegur til Parísar í dag og munu frönsk yfirvöld láta honum í té sjúkraskýrslu Arafats. Frönsk stjórnvöld hafa staðfastlega neitað því að eitthvað óvenjulegt sé við dauða Arafats. Lög sem vernda einkalíf fólks hafi hins vegar komið í veg fyrir að palestínskir leiðtogar hafi fengið að sjá sjúkraskýrslu hans. Samkvæmt frönskum lögum eiga aðeins ættingar rétt á að sjá sjúkraskýrslur látinna. Arafat lést á sjúkrahúsi í Frakklandi í síðustu viku.