Ógn steðjar að lífríki norðursins

Ógn steðjar að lífríki norðursins að mati vísindamanna en miðað við Reykjavíkuryfirlýsingu Norðurskautsráðsins, sem undirrituð var hér á landi í dag, á lítið að gera til að bregðast við ógninni. Átta utanríkisráðherrar funduðu og komust ekki að neinni haldbærri niðurstöðu um viðbrögð við hlýnun jarðar. Hlýnun norðurhvels er meiri og hraðari en áður var talið og draga verður úr útblæstri gróðurhúsalofttegunda. Þetta var niðurstaða nokkur hundruð vísindamanna sem kynntu niðurstöður sínar hér á landi nýlega. Í dag komu utanríkisráðherrar aðildarlanda Norðurskautsráðsins saman til að ganga frá svokallaðri „Reykjavíkuryfirlýsingum“ sem byggir á niðurstöðum vísindamannanna. Ekki var mælt með neinum aðgerðum í yfirlýsingunni sem reyndist fremur loðin. Viðmælendur fréttastofunnar í dag vildu meina að Bandaríkjamann neituðu að skrifa undir niðurstöður vísindamannanna en Bandaríkin eru eina aðildaland ráðsins sem ekki hafa undirritað Kyoto-bókunina. Dr Paula Dobriansky, aðstoðarvarautanríkisráðherra Bandaríkjanna, segir að ríkisstjórn landsins muni taka mat Norðurskautsráðsins á áhrifunum til greina jafnframt því sem haldið verði áfram að bregðast við loftslagsbreytingunum. Hún segist ánægð með viðræður og þann skilning sem ríkti meðal fundarmanna og telur að það sé borin virðing fyrir nálgun einstakra aðila. Spurð hvort þetta sé ekki lýsing á loðinni yfirlýsingu án nokkurra aðgerða segir Dobriansky svo ekki vera. Ef skoðuð sé yfirlýsing ráðherranna sést að hún tekur sérstaklega á atriðum eins og mildun og aðlögun, aðferðum sem hægt sé að beita. Náttúruverndarsinnar virðast ekki hafa mikið álit á þeim niðurstöðum sem fundarmenn komust að og talsmenn umhverfissamtakanna WWF dreifðu blaði á fundinum með fyrirsögninni: „No action og big melt“. Samantha Smith frá WWF segir samtökin mjög vonsvikin. Þau hafi vonað að heimskautslöndin öxluðu ábyrgð sína og gerðu það sem nauðsynlegt er til að bjarga norðurskautinu, eða a.m.k. að þau myndu lýsa yfir fyrirætlunum um að minnka losun koltvísýrings miklu meira. Spurð um álit sitt á óskum sumra landanna, þ.á m. Íslands, um stærri losunarkvóta segir Smith að gagnvart þessum vísindaniðurstöðum, sem séu mjög sterkar og sýni gífurlegar breytingar á norðurskautinu, verði löndin að sýna gott fordæmi með því að fara í hina áttina, þ.e. minnka losun koltvísýrings.