Ný ríkisstjórn í Ísrael

Unnið er að myndun nýrrar ríkisstjórnar í Ísrael þar sem Ariel Sharon forsætisráðherra og stjórnarandstöðuleiðtoginn Símon Peres hafa tekið höndum saman. Með þessu gæti Sharon aflað nægs stuðnings við áætlanir sínar um að Ísraelsmenn fari frá landnemabyggðum á Gasa. Ariel Sharon hefur ekki tekist að afla stuðnings innan síns eigin flokks, Líkúd-flokksins, við áætlanir um að Ísraelsmenn hverfi alfarið frá landnemabyggðum á Gasasvæðinu og fjórum svæðum á vesturbakkanum og eftirláti þannig Palestínumönnum landsvæðið. Til þess að koma áætluninni í framkvæmd hefur hann nú tekið höndum saman við Símon Peres, leiðtoga Verkamannaflokksins, sem er í stjórnarandstöðu. Peres segir Sharon hafa boðið sér formlega til viðræðna um myndun stjórnar á fundi þeirra í dag. Hann segir Sharon halda fast við áætlun sína um brotthvarf Ísraela frá áðurnefndum svæðum.  Sharon sagði við flokksfélaga sína í dag að í raun væri ekkert val. Ekki vegna þess að hann vilji það heldur vegna þess að flokkurinn eigi engra kosta völ. Sharon sagði þetta ástand ekki geta varað lengur.