Spænsk blíða í Hveragerði

"Við hófum tökur í síðustu viku hér á landi," segir Kristín Atladóttir, framkvæmdastjóri kvikmyndar sem Stuðmenn vinna að um þessar mundir. Ágúst Guðmundsson leikstýrir myndinni, sem er framhald af kvikmyndinni Með allt á hreinu. Upptökurnar í síðustu viku fóru fram í Hveragerði og kröfðust bongóblíðu. Útlitið var hins vegar ekki mjög gott samkvæmt veðurspá en úr rættist og með hjálp veðurguða og góðra manna var engu líkara en Stuðmenn landsins væru staddir á sundlaugarbökkum Benidorm. Raunin var hins vegar sú að gengið baðaði sig á bökkum sundlaugarinnar á Hótel Örk en Laugargerði, veitinga- og skemmtistað á neðstu hæð hótelsins, var jafnframt breytt í spænskan bar fyrir tökur kvikmyndarinnar. "Við erum núna stödd á Hótel Borg og erum að taka upp erfidrykkju," segir Kristín. "Upptökur fara mestmegnis fram á höfuðborgarsvæðinu utan atriðisins sem var tekið í Tívolíinu í Kaupmannahöfn í vetur og svo komum við til með að fara til Sankti Pétursborgar í haust," segir Kristín, sem líst afar vel á  verkefnið en Jakob Frímann Magnússon framleiðir kvikmyndina.