Blindur markvörður

"Við erum að vinna fyrir Hitt húsið og Sjálfsbjörg við að bæta ímynd öryrkjans. Við gerum ýmislegt í því starfi, erum meðal annars að vinna tónlistarmyndband, héldum sundlaugarpartí og nú næst tónleika," segir Gunnar Bjarni Guðbjörnsson en hann er liðsmaður í Götuhernaðinum. "Í fyrra fengum við borgarstjórann til að eyða deginum í hjólastól og nú höldum við áfram og fáum kunna knattspyrnukappa til að keppa við okkur í fótbolta. Tveir þeirra verða í hjólastól, einn með hækjur og tveir í viðbót með göngugrind. Síðan verður markvörðurinn þeirra með bundið fyrir augun en hann mun setja sig í fótspor markvarðar okkar sem er blindur," segir Gunnar og bætir því við að liðsmenn Götuhernaðarins ætli að bursta KSÍ-stjörnurnar. Meðal þeirra sem keppa við Gunnar og félaga eru Eyjólfur Sverrisson, Guðni Bergsson, Helena Ólafsdóttir, Björgólfur Takefusa og Kristján Finnbogason. "Þau tóku öll alveg rosalega vel í þetta og KSÍ var tilbúið að gera allt fyrir okkur. Redda búningum, bolta og öðru sem er nauðsynlegt fyrir fótboltaiðkun." Það er óhætt að segja að Götuhernaðurinn beiti óhefðbundnum leiðum til að vekja athygli á málefnum hreyfihamlaðra. "Við erum að vinna að tónleikum sem verða í Hinu húsinu 13. júlí og hljómsveitin Dys mun leika á og síðan er að fara í spilun tónlistarmyndband sem við höfum verið að vinna að. En næsta verkefni er að vinna fótboltastjörnurnar í fótbolta."