Grænfriðungar mættir til Sorrento

Grænfriðungar eru mættir til Sorrento á Ítalíu, til þess að mótmæla hvalveiðum, á ársfundi Alþjóða hvalveiðiráðsins. Þar verður á morgun, lögð fram tillaga um að halda áfram vinnu að samkomulagi um hvalveiðar í atvinnuskyni. Enginn býst við að á þessum ársfundi verði samþykkt að leyfa hvalveiðar í atvinnuskyni, á nýjan leik. Hinsvegar líta hvalveiðiþjóðir á það sem mikinn áfangasigur, ef samþykkt verður að halda áfram vinnu að samkomulagi um slíkt. Ef það fæst fram gætu hvalveiðar í atvinnuskyni hafist aftur árið 2006, en væntanlega með ýmsum ströngum skilyrðum. Telja má víst að þjóðir sem eru algerlega á móti hvalveiðum setji sig upp á móti þessu. Grænfriðungar eru mættir til Sorrento, til þess að mótmæla hvalveiðum. Fréttastofan náði í morgun sambandi við einn talsmanna samtakanna, Eriku Ágústínsson. Hún sagði að þau hefðu heyrt af fyrrnefndri tillögu, en ekki séð hana sjálf. Þau vildu bíða með að taka afstöðu, þar til þau vissu hvað í henni fælist.