74 ára maður tekinn af lífi

Sjötíu og fjögurra ára gamall maður var tekinn af lífi í Alabama-ríki í Bandaríkjunum í gær. Hann er elsti maður sem tekinn hefur verið af lífi þar í landi síðan dauðarefsingar voru leiddar í lög á ný árið 1976. Maðurinn, sem hét James Hubbard, myrti 62 ára gamla konu fyrir tuttugu og sjö árum, þá 47 ára gamall. Hann kynntist henni eftir að hafa hlotið reynslulausn úr fangelsi en þar hafði hann afplánað dóm fyrir manndráp. Hubbard var líflátinn með eitursprautu eftir að áfrýjunardómstólar Montgomery, Alabama og Hæstiréttur Bandaríkjanna höfðu neitað að fresta aftökunni.