Over the Rainbow besta lagið

Lagið Over the Rainbow úr myndinni The Wizard of Oz frá árinu 1939 hefur verið valið besta kvikmyndalag sögunnar af Bandarísku kvikmyndastofnuninni. Samanstendur hún af 1500 leikurum, kvikmyndagerðarmönnum, gagnrýnendum og fleiri áhrifamönnum í Hollywood. Það var Judy Garland í hlutverki sveitastúlkunnar frá Kansas, Dorothy Gale, sem söng lagið svona eftirminnilega. Lagið As Time Goes By úr Casablanca lenti í öðru sæti og Singin´ in the Rain úr samnefndri mynd í því þriðja. Listinn nær yfir 100 lög en alls voru 400 tilnefnd. Þetta er ekki í fyrsta sinn sem Over the Rainbow hlýtur titil sem þennan því árið 2001 var lagið valið það besta á síðustu öld ásamt White Christmas í flutningi Bing Crosby. Listasamtök Bandaríkjanna og Samtök upptökustjóra stóðu að því vali. "Lagið á skilið að vinna. Það er eitt af þessum stórkostlegu lögum," sagði tónlistarmaðurinn Burt Bacharach. "Tilfinninganæmur flutningur Judy Garland er ótrúlegur. Ég fæ gæsahúð í hvert sinn sem ég hlusta á það." Bacharach á sjálfur tvö lög á listanum. Annars vegar Raindrops Keep Falling on My Head (23. sæti) úr Butch Cassidy and the Sundance Kid og Arthur´s Theme (Best That You Can Do (79. sæti) úr gamanmyndinni Arthur. "Kvikmyndir og tónlist eru svo innilega tengd saman. Jafnvel áður en hljóð kom í kvikmyndir voru lög látin hljóma undir þöglu myndunum," sagði Bob Gazzale hjá Bandarísku kvikmyndastofnuninni. Elsta lagið sem komst á listann er Isn´t It Romantic (73. sæti) úr myndinni Love Me Tonight frá árinu 1932, í flutningi Maurice Chevalier og Jeanette MacDonald. Nýjustu lögin eru aftur á móti All That Jazz (98. sæti) úr myndinni Chicago í flutningi Catherine Zeta-Jones og Renee Zellweger og Lose Yourself (93. sæti) úr 8 Mile með rapparanum Eminem.