Rússar með nýjar kjarnorkuflaugar

Þeir sem töldu endalok Kalda stríðsins þýða endalok vopnakapphlaupsins virðast hafa haft rangt fyrir sér. Vladímír Pútín, forseti Rússlands, boðar nýja gerð kjarnorkusprengja, sem eiga að geta komist fram hjá stjörnustríðsskildi Bandaríkjanna. Pútín hefur ítrekað heitið því, að endurreisa Rússland sem hernaðarveldi, en undanfarinn áratug eða svo hefur rússneski herinn hálfpartinn fjarað út, sökum agaleysis og fjárskorts. Það kom því mörgum á óvart að Pútín skildi í morgun tilkynna um þróun nýrrar tegundar kjarnorkuvopna. Hann sagði þá að áfram yrði haldið að byggja upp rannsóknir og þróun á kjarnorkuflaugum og vonast væri til að innan skamms yrðu tekin í notkun nýjar kjarnorkuflaugar í Rússlandi, sem væru öflugri en aðrar þjóðir hefðu til umráða, eða myndu hafa til umráða á næstu árum. Hann gaf engar upplýsingar um hvers eðlis þessi nýju vopn ættu að vera, en þau eru sögð vera öðruvísi en vopn annarra kjarnorkuvelda. Sergei Ívanov, varnarmálaráðherra Rússlands, lýsti því yfir fyrr í þessum mánuði að ný, færanleg tegund Topol-M flugskeytis væri á teikniborðinu, en þau eru mjög langdræg, komast yfir tíuþúsund kílómetra leið. Að auki er talið að Rússar vinni að þróun nýrrar risakjarnorkusprengju, flugskeytis sem gæti borið tíu sprengjuodda allt að fjögur tonn á þyngd. Og Rússar hafa jafnframt sagst búa yfir kjarnorkuskeyti, sem kemst fram hjá hinum svokallaða stjörnustríðsskildi Bandaríkjamanna.