Sendinefnd til Parísar

Úr hverju dó Jassir Arafat? Það vilja palestínsk yfirvöld fá að vita og hyggjast senda nefnd til Parísar til að krefjast svara. Frá því að Arafat var lagður helsjúkur inn á sjúkrahús í París með ótilgreindan sjúkdóm hafa verið á kreiki sögusagnir þess efnis að ekki væri allt með felldu. Þegar hann lést tvíefldust þeir sem voru sannfærðir um að dauða hans hefði ekki borið að með eðlilegum hætti, og nú vilja palestínsk yfirvöld fá botn í málið. Nabil Abu Rdeneh, talsmaður stjórnvalda í Palestínu segir að sendinefnt fari brátt til Parísar, þar sem farið verði fram á öll gögn um heilsufar Arafats, til þess að fá úr því skorið hvert banamein hans var. Hann segist vona að frönsk yfirvöld sýni því skilning að þetta sé opinbert mál, sem verði að fá að líta dagsins ljós. Frönsk yfirvöld neituðu því í dag að vísbendingar hefðu fundist um að Arafat hefði verið byrlað eitur. Dagblaðið Le Monde hefur eftir heimildarmönnum, að dreifð blóðstorknun og skorpulifur hafi verið banamein leiðtogans. Aðeins nánustu ættingjar hans vita sannleikann, og þeir verða að gefa yfirvöldum leyfi til að greina frá honum.