Uppsveifla í vopnasölu

Rússneskir vopnasalar eru himinlifandi en viðskiptin blómstra og skapar þessi iðnaður miklar tekjur fyrir landið. Sem fyrr eru það Kínverjar og Indverjar sem eru áhugasamastir um kaup af Rússum og er þá ekki eingöngu um tæki og tól að ræða heldur ennfremur tækni. Allt virðist seljast og vekur það Bandaríkjamönnum vaxandi áhyggjum en þeir hafa margoft aðvarað Rússa vegna viðskipta þessara. Kínverjar hafa þannig keypt allt að hundrað flugvélar síðustu ár. Um er að ræða bæði orrustuþotur og sprengjuflugvélar. Þeir hafa einnig verslað um tuttugu dísilkafbáta af Kilo-gerð en þeir eru búnir allra fullkomnasta búnaði sem völ er á í kafbátum. Indverjar hafa að sama skapi sótt í smiðju Rússanna. Sýna þeir þó meiri áhuga á langdrægum eldflaugum og smærri vopnum. Bandarísk skýrsla sem birt var fyrir viku segir að vegna þessara miklu viðskipta Kínverja við Rússa sé orðið ljóst að um afar öflugan óvin verði að ræða ef sú staða kemur upp að grípa þarf til vopna fyrir hönd Taívan. Innan Evrópusambandsins heyrast æ oftar raddir sem vilja aflétta vopnasölubanni til Kína og er það áhyggjuefni. Það mundi gera Kínverjum kleift að velja úr mun meira úrvali tækja og tækni en þeir hafa nú þegar. Annað sem Bandaríkjastjórn undrast er vopnasala Ísraelsmanna til Kínverja. Er hún í mun minna mæli en Rússa en afar tæknileg þar sem Ísrael fær hvert ár tugi milljarða króna að gjöf frá Bandaríkjamönnum gagngert í þeim tilgangi að þróa vopn sín og tæki. Þykja ísraelsk vopn því góð kaup og það hafa Kínverjar nýtt sér.