Cosby óánægður með hörundsdökka

Leikarinn góðkunni Bill Cosby hefur enn og aftur lýst yfir óánægju sinni með hugarfar hörundsdökkra landa sinna. Cosby segir hörundsdökk börn ekki hafa neina stefnu í lífinu og þau séu upp til hópa illa læs og skrifandi. Sökina segir hann liggja hjá foreldrunum sem kenni börnum sínum ekki einu sinni að tala móðurmálið almennilega. Þá sé allt of algengt að hvítum mönnum sé kennt um allt sem miður fer og aldrei litið í eigin barm. Hann telur hörundsdökkt fólk upp til hópa vera að eyðileggja það sem vannst með réttindabaráttunni sem háð var á dögum Martins Luthers King og snúa verði við blaðinu ef ekki eigi illa að fara.