Útlitið slæmt fyrir Hróarskeldu

Gamla goðið David Bowie hefur aflýst þátttöku sinni í Hróarskelduhátíðinni í ár. Hann hefur neyðst til þess að aflýsa þremur tónleikum til viðbótar síðustu vikuna vegna klemmdrar taugar í baki. Hann er undir lækniseftirliti og barst hátíðarhöldurum tilkynning í gær um að Bowie yrði ekki nægilega hraustur til þess að geta troðið upp. Hann var eitt stærsta nafnið á hátíðinni í ár. Auk meiðslanna ætti hann að vera orðinn þreyttur á tónleikaferðalögum, sem hann hefur verið í síðan í haust. Ekki hefur það bætt skap hans að fá sleikjó í augað á tónleikum í Noregi. Svo er óhætt að fullyrða að veðurspáin fyrir Hróarskelduhátíðina sé ekki sem glæsilegust. Hátíðargestir ættu að taka með sér regngallann. Þeir mega einnig búast við því að það fjúki aðeins í þá. Á fimmtudaginn er spáð rigningu. Vindur verður sterkari því lengra sem líður á kvöldið, og er spáð miklu roki um kvöldið. Föstudagurinn ætti að verða tónleikagestum bærilegastur, því þá spá danskir veðurfræðingar þurrum degi og allt að 17 gráðu hita. Þó verður þungskýjað að mestu, og þónokkur vindur. Útlitið versnar svo töluvert á laugardag og sunnudag. Þá er spáð þrumuveðri, með tilheyrandi roki og rigningu. Reyndar er spáin mismunandi eftir veðurstofum í landinu. Allar spá þó rigningu á fimmtudag, laugardag og sunnudag. Mörg ár eru síðan veðurspáin hefur verið svona slæm á þeirri helgi sem hátíðin er haldin, en sumrið hefur verið óvenju blautt á meginlandi Evrópu fram til þessa. Breska sveitin Muse hefur svo aflýst tvennum tónleikum í þessari viku eftir að pabbi trommuleikarans lést skyndilega á Glastonbury-hátíðinni, þar sem sveitin kom fram. Það verður því að teljast ólíklegt að Muse komi fram á Hróarskelduhátíðinni þó svo að sveitin sé ekki búin að aflýsa þátttöku sinni formlega.