Erlent

Enn leitað að þremur í kolanámu

Enn er leitað að þremur kolanámumönnum eftir námusprenginguna í Síberíu á mánudag. 107 fórust staðfest í slysinu, sem er mannskæðasta námuslys Rússlands í áratug, og von um að síðustu þrír finnist á lífi er afar veik.

Vill að rætt sé við uppreisnarmenn

Tarek al-Hahsemi, varaforseti Íraks hvetur til þess að stofnað verði til viðræðna við uppreisnarhópa í landinu og sú aðferð notuð til að reyna að koma á friði. Hann sagðist í samtali við BBC trúa því að hægt væri að ræða við alla þessa hópa, nema kannski al-Kaída, en þeir væru hluti af samfélaginu í Írak. Þá sagði hann veru herliðs Bandaríkjamanna og annara þjóða í landinu særa stolt þjóðarinnar og að fram þurfi að koma fljótt áætlun fyrir brotthvarf þeirra.

Uppreisnarmenn beita börnum fyrir sig

Talsmaður bandaríska hersins sagði í dag að uppreisnarmenn í Írak hefðu notað börn í sprengjuárás. Hershöfðinginn Michael Barbero sagði að bíl hefði verið hleypt í gegnum öryggishlið þar sem tvö börn sátu í aftursætunum. Bíllinn var síðan sprengdur í loft upp.

Betur má ef duga skal í Afganistan

Fulltrúar frá Afganistan og öðrum þjóðum mæltu viðvörunarorð vegna ástandsins í Afganistan á fundi öryggisráðs Sameinuðu þjóðanna í kvöld. Hver á fætur öðrum steig í pontu og bentu allir á að ofbeldi í landinu væri enn að aukast, fíkniefnastarfsemi hvers konar blómstraði og hægt gengi að byggja upp stofnanir í landinu.

Gáfu út 10.000 vegabréf til svikahrappa

Þúsundum manna, og þar á meðal tveimur sem dæmdir hafa verið fyrir hryðjuverkaárásir, tókst að verða sér út um vegabréf hjá breska innanríkisráðuneytinu á fölskum forsendum á síðastliðnu ári. Allt í allt er talið að um tíu þúsund vegabréf sé um að ræða.

Segir demókrötum að taka tilboðinu

George W. Bush, forseti Bandaríkjanna, sagði í kvöld að demókratar ættu að taka tilboði hans um að leyfa tveimur háttsettum aðstoðarmönnum hans að ræða við þingnefnd á þeirra vegum. Bush hefur neitað því að leyfa demókrötum að yfirheyra aðstoðarmenn sína eiðsvarna. Aðstoðarmennirnir sem um ræðir eru Karl Rove og Harriet Miers.

Hóta að draga úr valdi FBI

Þingmenn í fulltrúadeild bandaríska þingsins hafa hótað því að afnema þær lagaheimildir sem Alríkislögregla Bandaríkjanna, FBI, hefur til þess að rannsaka hugsanlega hryðjuverkamenn. Á þetta við um bæði demókrata og repúblikana.

Þriðjungur írösku lögreglunnar spilltur

Háttsettur lögregluforingi í írösku lögreglunni sagði í dag að hann gæti ekki treyst þriðjungi lögreglumanna sinna þar sem hollusta þeirra væri hjá ólöglegum vígahópum. Lögregluforinginn, Abdul Hussein Al Saffe, sagði enn fremur að hann gæti ekki rekið þá þar sem þeir nytu verndar stjórnmálamanna.

Átök blossa upp í Pakistan

Fleiri en 50 manns hafa látið lífið í átökum stuðningsmanna al-Kaída og talibana í norðvesturhluta Pakistan. Yfirvöld í Pakistan skýrðu frá þessu í dag. Átökin hafa geisað á svæðinu síðan á mánudaginn.

Ástandið í Írak veldur vonbrigðum

Utanríkisráðherra segir að ástandið í Írak valdi vissulega vonbrigðum en það sé áfram stefna íslensku ríkisstjórnarinnar að styðja írösku þjóðina eftir megni. Fjögur ár eru í dag frá upphafi átaka í landinu og endurreisn landsins heldur áfram í skugga ofbeldis.

Lentu í deilum við konu á Hebron

Íslenskur karlmaður um tvítugt var færður til yfirheyrslu hjá ísrelsku lögreglunni í Hebron á Vesturbakkanum í fyrradag. Ísraelsk kona sem þau lentu í útistöðu við hafði þá kært danska vinkonu hans fyrir líkamsárás. Atvikið náðist allt á myndband.

Handtóku 171 í aðgerðum gegn mafíunni

Ítalska lögreglan handtók í dag vel á annað hundrað manns í aðgerðum gegn mafíunni í Napólí. Heilu fjölskyldurnar voru þá sendar í steininn en alls var um 171 manns að ræða. Þúsund lögreglumenn tóku þátt í aðgerðunum. Eiturlyfjahringur var leystur upp og afhjúpuð ýmis glæpastarfsemi sem mun að sögn lögreglu hafa skilað jafnvirði rúmlega þrjátíu milljóna króna í tekjur á mánuði.

Júdas var góður gæi

Lögreglan stöðvaði líkfylgd

Lögregla í Hollandi hefur verið gagnrýnd fyrir að stöðva líkfylgd til að taka öndunarpróf af ökumönnum. Syrgjendurnir voru nýlagðir af stað frá kirkju í Enschede á leið til kirkjugarðsins Usselo. Lögreglan leyfði líkbílnum og fjórum næstu bílum að halda ferðinni áfram. Tíu bifreiðum fjölskyldumeðlima og vina var hins vegar vikið til hliðar.

Uppnám í Evróvision

Mikið uppnám varð í Evróvision söngvakeppninni, í gær, þegar í ljós kom að bresku þáttakendurnir höfðu leynilega liðsmenn. Í söngbandinu Scooch eru tvær stúlkur og tveir piltar. Í keppninni í gær kom í ljós að þau höfðu tvær stúlkur baksviðs, sem sungu með. Hinir þáttakendurnir urðu öskureiðir og sökuðu Scooch um svindl og svínarí. Um að hafa leikið að þau væru að syngja.

Ísraelar hunsa Norðmann

Ísraelar hafa aflýst öllum fundum með Raymond Johansen, ráðuneytisstjóra norska utanríkisráðuneytisins. Johansen er í Miðausturlöndum og átti í gær fund með Ismail Haniyeh, forsætisráðherra Hamas í þjóðstjórn Palestínumanna. Hann átti að hitta ísraelska ráðamenn í dag, en þeim fundum var aflýst.

Lélegur brandari

Tuttugu og níu ára gamall Kaupmannahafnarbúi hefur verið dæmdur í tíu daga skilorðsbundið fangelsi fyrir að segja að hann væri með skammbyssu. Það þótti lélegur brandari á Kastrup flugvelli, þar sem maðurinn var að fara um borð í flugvél til útlanda.

Kinnbeinin orsökuðu hrakfarir

Kínverskur maður lét minnnka kinnbeinin í lýtaaðgerð til að eiginkonan myndi lifa lengur. Spákonur sögðu Lang Qiang að konan myndi deyja á undan honum, vegna kinnbeinanna. Lang var sannfærður um að það væri rétt þar sem konan var einstaklega óheppin, en hann ekki.

Flóttamannabúðir að fyllast

Flóttamannabúðir sem ætlaðar eru fyrir þá sem þurft hafa að flýja frá heimilum sínum í Darfur-héraði í Súdan eru að fyllast. Þetta segja embættismenn Mannréttindaskrifstofu Sameinuðu þjóðanna. Meira en 80 þúsund manns hafa flúið heimili sín það sem af er ári og alls hafast um 2 milljónir manna við í flóttamannabúðum. Flestir hafa þurft að yfirgefa heimili sín vegna átakanna sem geysað hafa milli Janjaweed hersveitanna sem eru hliðhollar stjórnvöldum og uppreisnarhópa. Minnst 200 þúsund hafa farist í átökunum.

Bíræfnir súkkulaðieggjaþjófar

Vörubíl fullum af Cadbury súkkulaðieggjum var stolið í Stafford-skíri í Englandi í dag. Eggin eru 70 þúsund punda virði. Þrír þjófar nörruðu bílstjóra vörubílsins til að stöðva við hraðbraut og til að stíga út úr bílnum með því að segja honum að vörur væru að detta úr bílnum. Þegar hann stökk út til að athuga málið stukku þjófarnir aftur inn í vörubílinn og brunuðu í burtu. Súkkulaðieggjaþjófarnir eru enn ófundnir.

Erfðabreyttar moskítóflugur þróaðar gegn malaríu

Vísindamenn hafa þróað og ræktað erfðabreyttar moskítóflugur sem bera í sér mótefni gegn malaríu. Vonast er til að hægt verði að koma þessum flugum út í umhverfið og að þær taki yfir þær flugur sem bera með sér malaríu, en moskítóflugur eru helstu smitberar malaríu.

Rússar láta af kjarnorkuviðskiptum við Íran

Rússar hafa tilkynnt írönskum stjórnvöldum að þeir muni hætta viðskiptum við þá með kjarnorkueldsneyti láti þeir ekki af auðgun úrans. Það var Igor Ivanov, ritari öryggisráðs Rússa, sem tilkynnti Hosseini Tash, fulltrúa kjarnorkumála Írana, þetta í síðustu viku.

Evrópubúar neikvæðir í garð ESB

Í dag eru 50 ár frá stofnun Evrópusambandsins. Af því tilefni lét Financial Times gera skoðanakönnun en samkvæmt henni segja 44% íbúa fimm Evrópusambandslanda að lífsgæði þeirra hafi versnað eftir að landið gekk í Evropusambandið.

Bush er versti forseti sögunnar

Bush, Cheney og Rice eru óhæf og stríðið í Írak er algjört klúður. Þetta sagði viðskiptajöfurinn Donald Trump í viðtali á CNN-sjónvarpsstöðinni í gær. Hann segir meint klúður í Írak einum manni að kenna og engum öðrum, núverandi forseta Bandaríkjanna sem hann segir versta forseta í sögu Bandaríkjanna. Hann segir að vegna Íraksstríðsins hafi Bandaríkin tapað tiltrú og samúð. Trump er þrátt fyrir þetta þekktur fyrir að vera harður repúblikani.

Mugabe hótar að senda sendiherra úr landi

Robert Mugabe forseti Simbabve hótar nú að senda alla sendiherra vesturvelda úr landi og sakar þá um að ýta undir að framið verði valdarán í landinu.

Varaforseti Saddams hengdur

Taha Yassin Ramadan, fyrrverandi varaforseti Saddam Hussein var tekinn af lífi í nótt. Hann var hengdur fyrir sömu morð og Saddam, á 148 síjum í Dujai á níunda áratugnum. Upphaflega var Ramadan dæmdur í lífstíðarfangelsi en dómur hans var þyngdur eftir áfrýjun.

WWF óttast um fljót

Sum af helstu stórfljótum heims eru í bráðri hættu vegna þess hve mikið er búið að virkja í þeim, sigla á þeim og menga þær. Þetta kemur fram í skýrslu World Wildlife Fund sem út kom í gær. Af tíu fljótum sem talin eru upp í skýrslunni má nefna Yangtse og Mekong í Kína, Ganges á Indlandi, Dóná og Rio Grande. Í skýrslunni segir að heimsbyggðin standi frammi fyrir skorti á ferskvetni og segja þá hættu að minnsta kosti jafn alvarlega og hlýnun loftslags.

ESB sniðgengur þjóðstjórn

Evrópusambandið ætlar ekki að viðurkenna þjóðstjórn Palestínumanna frekar en Bandaríkin eða Ísrael. Stjórnin verður sniðgengin og Palestínumenn fá enga fjárhagsaðstoð frekar en undanliðið ár, síðan Hamas-samtökin komust til valda.

Strætóverkfall í Kaupmannahöfn

Strætisvagnabílstjórar í Kaupmannahöfn hafa ekki sest undir stýri þennan morguninn heldur funda þeir um kjaramál sín. Fyrir vikið liggja strætisvagnasamgöngur því sem næst niðri í borginni. Þeir krefjast rúmlega 5 prósenta launahækkunar og einnig þess að laun strætisvagnabílstjóra annars staðar í landinu verði hækkuð til samræmis. Strætisvagnastjórar á Mið-Jótlandi lögðu niður störf í gær með sömu kröfur.

Danskir piltar eyða meira

Danskir unglingspiltar eyða meiri peningum í að kaupa sér föt en jafnöldrur þeirra af hinu kyninu. Þetta kemur fram í fríblaðinu 24 timer þennan morguninn. Í úrtakshóp sem kannaður var eyddu 42 prósent drengja á aldrinum 13 til 16 ára meira en þúsund dönskum krónum í föt á mánuði á meðan einungis 27 prósent stúlknanna fóru með sömu upphæð.