Bónusstig ef innflytjandi stingur putta í vatnið

Ratleikur sem nemendur úr Verzlunarskóla Íslands stóðu fyrir á dögunum hefur vakið athygli.

Í reglum leiksins kemur fram að stig séu m.a. gefin fyrir að trufla fund femínista í Menntaskólanum í Reykjavík, fara í sleik við einhvern af sama kyni og drekka vatn úr polli í Æsufellinu. Bónusstig fást ef innflytjandi stingur puttanum í vatnið áður en það er drukkið.

„Þetta endurspeglar á engan hátt það sem nemendafélagið og skólinn stendur fyrir," segir Hrafnkell Ásgeirsson forseti Nemendafélags Verzlunarskóla Íslands.

Hrafnkell segir að ratleikurinn hafi verið uppátæki eins bekkjar innan skólans, tuttugu manns af 1230 nemendum. Þannig hafi aðeins brot af nemendum skólans tekið þátt í eða vitað af umræddum leik.

Hrafnkell var tiltölulega nýbúinn að sjá reglur leiksins og hafði ekki enn heyrt frá skólastjóranum Inga Ólafssyni vegna málsins.

Brot úr reglum ratleiksins hefur verið dreift á Facebook í dag og vakið hörð viðbrögð hjá fjölmörgum notendum samfélagsmiðilsins.

„Þetta er mislukkað grín. Mjög leiðinlegur pakki og mjög ósmekklegt," segir Hrafnkell sem á allt eins von á því að NFVÍ sendi frá sér tilkynningu þess efnis að svona líðist ekki.