Hlerun í Alþingi: „Grafalvarlegt ef satt reynist“

„Ég er sleginn yfir þessu og ef eitthvað er hæft í þessum fréttum, er þetta grafalvarlegt. Þetta kemur okkur á óvart. Við munum reyna að ganga úr skugga um það hvort eitthvað sé hæft í þessu sem allra fyrst. Þetta er mjög alvarlegur hlutur ef rétt er og það verður að koma í veg fyrir að svona upplýsingar séu birtar. Sama hver búi yfir þeim,“ segir Helgi Bernódusson, skrifstofustjóri Alþingis. Julian Assange sagði í meintu samtali við Chelsea Manning í mars 2010, sem þá hét Bradley Manning, að Wikileaks ætti upptökur úr símum Alþingis Íslendinga yfir fjögurra mánaða tímabil, í nóvember og desember 2009 og janúar og febrúar 2010. Þessu var haldið fram á síðunni wired.com nýlega.

Á því tímabili sem samtalið átti sér stað var Assange einmitt staddur hér á landi.

Frétt var birt á Vísi í gær, þar sem sagt var frá skjölum sem birt voru á  Wired.com. Þar er því haldið fram að skjölin komi frá bandaríska hernum og merkingar á skjölunum benda til þess, að þau hafi verið notuð sem sönnunargögn í málaferlum hersins gegn Manning.

Í samtalinu á Assange að ganga undir nafninu Nathaniel Frank og Manning á að ganga undir nafninu Nobody.

Í meintu samtali þeirra spyr Manning hvort eitthvað gagnlegt sé að finna í upptökunum, en Assange svarar að hann hafi manneskju til að fara yfir það, sjálfur hafi hann ekki tíma. Assange minnist svo aftur á að hann hafi fengið gögn frá Alþingi og því svarar Manning með broskalli og segir það sprenghlægilegt.

Einar Kristinn Guðfinnsson, forseti Alþingis hafði heldur ekki heyrt af þessu máli. „Það kemur mér í opna skjöldu að því sé haldið fram að símar Alþingis hafi verið hleraðir. Það væri auðvitað grafalvarlegt mál og ef um svo alvarlega hluti væri að ræða þá væri það lögbrot,“ segir Einar Kristinn. „Þetta er alveg ótrúlegt ef satt er. Ég hef ekki fengið neinar vísbendingar um þetta og þetta eru mér fullkomlega ný tíðindi ef satt reynist.“

Athygli vekur að dularfull tölva fannst í húsnæði á vegum Alþingis í febrúar árið 2010 og grunur lék á tölvan hafi haft þann tilgang að brjótast inn í tölvur þingmanna og tölvukerfi Alþingis.

Assange var á Íslandi þegar samtalið á að hafa átt sér stað og segir að hann sé undir eftirliti lögreglu. Að hann hafi séð lögreglu vakta hótel sitt og að innanbúðarmaður hans hafi staðfest það.

Í þessu meinta samtali gera Assange og Manning grín að hugmynd um að gera dramatíska kvikmynd um Wikileaks. Samkvæmt hugmyndinni ætti myndin að innihalda spillingu, launmorðingja, njósnir og skemmdaverk og væru gróðamöguleikar slíkrar myndar miklir.

Í þeirri umræðu segir Assange: „Ég skynja blekkingu til að draga $ frá fólki.“

Wikileaks hefur birt gögn varðandi Ísland. Undir lok ársins 2010 birtu Wikileaks skjöl frá embættismönnum í sendiráði Bandaríkjanna hér á landi. Stór hluti skjalanna fjallaði um samband Íslands og Evrópusambandsins, en annars um stjórnmálin hér á landi.