Pongolle til Spánar

Franski framherjinn Florent Sinama-Pongolle hjá Liverpool er genginn í raðir spænska liðsins Recreativo sem vann sér sæti í úrvalsdeildinni í vor. Pongolle hefur skrifað undir eins árs samning við ítalska liðið, en hann náði ekki að festa sig í sessi hjá Liverpool og var hjá Blackburn sem lánsmaður á síðustu leiktíð.

Juventus mætir Rimini í fyrsta leik

Í dag var loksins gefin út leikjaniðurröðun í ítalska boltanum, en miklar tafir hafa orðið á því í kjölfar knattspyrnuskandalsins sem tröllriðið hefur Ítalíu í sumar. Stórlið Juventus spilar sinn fyrsta leik í B-deildinni á útivelli 9 september gegn smáliði Rimini sem var í fallbaráttu í deildinni á síðustu leiktíð.

Titillinn er formsatriði hjá Valsstúlkum

Þrettánda og næst síðasta umferðin í Landsbankadeild kvenna fór fram í kvöld. Valsstúlkur tryggðu sér nánast Íslandsmeistaratitilinn með því að leggja Keflavík 4-0 á útivelli og það þýðir að Breiðablik, sem vann Fylki 6-2 í kvöld, þarf að vinna lokaleik sinn með yfir 30 marka mun og treysta á að Valur tapi í lokaumferðinni til að eiga möguleika á að verja titil sinn frá því í fyrra.

Sex leikir fóru fram í kvöld

Sex leikir fóru fram í þýsku úrvalsdeildinni í handknattleik í kvöld og þar voru Íslendingar í eldlínunni á nær öllum vígstöðvum eins og venjulega.

Ullrich og T-Mobile komast að samkomulagi

Forráðamenn hjólreiðaliðsins T-Mobile hafa komist að samkomulagi við hjólreiðamanninn Jan Ullrich um að rifta samningi hans í kjölfar þess að hann var sakaður um að hafa misnotað lyf fyrr í sumar. Ullrich var í fyrstu rekinn umsvifalaust frá liðinu, en Ullrich var mjög ósáttur við þá niðurstöðu og eftir stíf fundarhöld hefur nú náðst samkomulag milli hans og liðsins.

Nadal í aðra umferð

Spænski tennisleikarinn Rafael Nadal komst í dag í aðra umferð opna bandaríska meistaramótsins í tennis þegar hann lagði Mark Philippoussis 6-4, 6-4 og 6-4. Þá eru fyrrum sigurvegarar á mótinu Lleyton Hewitt og Marat Safin einnig komnir áfram eftir góða sigra.

Thatcher fær sekt og bann hjá City

Forráðamenn enska úrvalsdeildarliðsins Manchester City hafa tilkynnt að varnarmaðurinn Ben Thatcher hafi verið settur í sex leikja bann og verið gert að greiða sem nemur sex vikna launum hjá félaginu fyrir líkamsárás hans á Pedro Mendes, leikmann Portsmouth í leik liðanna á dögunum.

Charlton kaupir Diawara

Enska úrvalsdeildarfélagið Charlton hefur fest kaup á senegalska landsliðsmanninum Souleymane Diawara frá franska félaginu Sochaux fyrir 3,7 milljónir punda og hefur hann skrifað undir fjögurra ára samning við félagið. Hann er áttundi leikmaðurinn sem gengur í raðir Charlton í sumar.

Landsliðið leikur sjö æfingaleiki fyrir HM

Íslenska karlalandsliðið í handbolta leikur væntanlega sjö landsleiki í undirbúningi sínum fyrir lokakeppni heimsmeistaramótsins sem fram fer í Þýskalandi í janúar á næsta ári, en mikil eftirvænting ríkir nú þar í landi fyrir mótinu og aðgöngumiðar renna út eins og heitar lummur.

Huth og Woodgate komnir til Boro

Enska úrvalsdeildarliðið Middlesbrough fékk góðan liðsstyrk í dag þegar það gekk frá kaupum á þýska landsliðsmanninum Robert Huth frá Chelsea og fékk auk þess til liðs við sig varnarmanninn Jonathan Woodgate á lánssamningi frá Real Madrid.

Framtíð Carlos Tevez enn óljós

Bresku slúðurblöðin hafa mikinn áhuga á máli argentínska framherjans Carlos Tevez hjá Corinthians í Brasilíu, en framherjinn ungi og öflugi hefur verið orðaður við Manchester United og Arsenal á síðustu dögum. Blöðunum ber ekki saman um hvar hann kemur til með að enda, en nú styttist óðum í að félagaskiptaglugginn lokist í Evrópu.

Ferdinand æfði einn í dag

Miðvörðurinn Rio Ferdinand hjá Manchester United æfði ekki með félögum sínum í enska landsliðinu á fyrstu æfingu liðsins fyrir leikina gegn Andorra og Makedóníu í undankeppni EM, heldur æfði hann einn síns liðs. Ferdinand er enn ekki orðinn góður af támeiðslunum sem hann varð fyrir í leik Manchester United og Watford á dögunum.

Andi Zidane svífur enn yfir okkur

Franska landsliðið er nú að leggja lokahönd á undirbúning sinn fyrir fyrstu tvo leiki sína í undankeppni EM 2008, en eins og allir vita verður liðið án aðalstjörnu sinnar Zinedine Zidane sem lagði skóna á hilluna eftir skrautlegt heimsmeistaramót í sumar.

Stutt gaman hjá Boskamp í Belgíu

Ferill hollenska knattspyrnuþjálfarans Johan Boskamp hjá liði Standard Liege í Belgíu varð ekki sérlega langur eða glæsilegur, því á blaðamannafundi í dag verður tilkynnt að honum hafi verið sagt upp störfum. Liðið hafnaði í öðru sæti í deildinni á síðustu leiktíð en undir stjórn Boskamp hefur það aðeins fengið tvö stig úr fyrstu fjórum leikjunum í sumar. Boskamp var áður stjóri Stoke City á Englandi.

Neil Mellor farinn til Preston

Enska úrvalsdeildarfélagið Liverpool seldi í dag sóknarmanninn Neil Mellor til 1. deildarliðs Preston en kaupverðið hefur ekki verið gefið upp. Mellor er 23 ára gamall og hefur átt við mikil og erfið meiðsli að stríða undanfarið. Hann gerði garðinn frægan með varaliði Liverpool þar sem hann skoraði grimmt, en náði aldrei að festa sig í sessi með aðalliðinu þrátt fyrir lipra spretti.

Portsmouth gerir tilboð í Andy Cole

Enska úrvalsdeildarfélagið Portsmouth hefur nokkuð óvænt gert Manchester City kauptilboð í fyrrum landsliðsframherjann Andy Cole hjá Manchester City. Cole er 34 ára gamall og er nýstiginn upp úr erfiðum hnémeiðslum sem hann hlaut undir lok tímabilsins í vor.

Gravesen til Celtic

Danski landsliðsmaðurinn Thomas Gravesen hefur gengið frá þriggja ára samningi við Glasgow Celtic í Skotlandi, en félagið festi í dag kaup á honum frá spænska félaginu Real Madrid. Í gær bárust þær fréttir að slitnað hefði upp úr viðræðum milli leikmannsins og forráðamanna Celtic, en þær reyndust ekki á rökum reistar.

Lee verður áfram hjá Tottenham

Suður-Kóreumaðurinn Lee Young-Pyo verður áfram í herbúðum Tottenham eftir að uppúr slitnaði í samningaviðræðum hans og forráðamanna ítalska félagsins Roma. Félögin höfðu komist að samkomulagi um kaupverðið og ekkert því til fyrirstöðu að leikmaðurinn færi til Ítalíu, en hann bakkaði út úr viðræðum á síðustu stundu og hætti við allt saman.

Leroy Lita í haldi lögreglu

Leroy Lita, framherji Íslendingaliðsins Reading í ensku úrvalsdeildinni, er nú í haldi lögreglu eftir að hann gaf sig fram í tengslum við líkamsárás á næturklúbbi í Bristol aðfararnótt sunnudags. Lita er sagður hafa skallað annan mann á klúbbnum og á yfir höfði sér kæru fyrir líkamsárás. Lita verður væntanlega laus úr haldi gegn tryggingu í dag, en málið er í rannsókn.

Sex leikmenn í bann

Aganefnd KSÍ hefur úrskurðað sex leikmenn í eins leiks bann í Landsbankadeild karla vegna fjölda áminninga og missa þeir því af leikjum sinna liða í 16. umferðinni. Þetta eru Keflvíkingarnir Baldur Sigurðsson og Símun Samuelsen, Hörður Bjarnason og Valur Adolf Úlfarsson úr Víkingi, Jóhann Helgason frá Grindavík og Matthías Guðmundsson úr Val.

Kiel lagði Hamburg

Tveir leikir fóru fram í annari umferð þýsku úrvalsdeildarinnar í handbolta í gær. Meistarar Kiel unnu góðan sigur á Hamburg á útivelli 38-30, eftir að hafa verið undir 14-13 í hálfleik. Þá unnu nýliðar Eintracht Hildesheim góðan sigur á Kronau Östringen 35-27.

Grikkir og Bandaríkjamenn í undanúrslit

Evrópumeistarar Grikkja og Bandaríkjamenn tryggðu sér í morgun sæti í undanúrslitum HM í körfubolta sem fram fer í Japan. Grikkir unnu Frakka auðveldlega 73-56 í morgun og í hádeginu lögðu Bandaríkjamenn Þjóðverja 85-65, þrátt fyrir að vera langt frá sínu besta í sóknarleiknum.

Tilboði Liverpool í Lucas Neill hafnað

Enska úrvalsdeildarfélagið Blackburn hafnaði í morgun 2 milljón punda tilboði Liverpool í ástralska varnarmanninn Lucas Neill, sem sagður er vilja fara frá Blackburn. Hann á aðeins eitt ár eftir af samningi sínum og hefur neitað að framlengja við félagið, svo talið er að hann muni fara frá félaginu áður en félagaskiptaglugginn lokast um mánaðamótin.

Aston Villa kaupir Petrov

Enska úrvalsdeildarfélagið Aston Villa hefur fest kaup á búlgarska miðjumanninum Stilian Petrov frá Glasgow Celtic í Skotlandi fyrir um 6,5 milljónir punda. Petrov var lykilmaður í liði Celtic undir stjórn Martin O´Neill á sínum tíma og ætti því ekki að verða í vandræðum með að falla inn í lið Aston Villa í dag, þar sem O´Neill er nú við stjórnvölin. Petrov skrifaði undir fjögurra ára samning við félagið.

Hélt ég myndi aldrei losna við meiðslin

Sölvi Geir Ottesen knattspyrnumaður var heldur óvænt í byrjunarliði Svíþjóðar­meistara Djurgården þegar liðið mætti Hammarby í leik í sænsku úrvalsdeildinni í fyrrakvöld. Hann er nýstiginn upp úr erfiðum meiðslum þar sem hann sleit krossbönd í hné en reyndar hefur hann nánast sleitulaust verið meiddur síðan hann gekk til liðs við félagið fyrir rúmum tveimur árum síðan.

Stokkhólmsslagurinn leystist upp

Fimmtán þúsund manns mættu á Stokkhólmsslag Hammarby og Djurgården í sænsku úrvalsdeildinni í fyrrakvöld en flauta varð leikinn af á 55. mínútu þar sem áhorfendur skutu blysum og flugeldum inn á völlinn og réðust nokkrir þeirra inn á sjálfan völlinn og veittust að leikmönnum og dómurum.

Landsliðsfyrirliðinn hógvær eftir sigurmarkið gegn Celta Vigo

Eiður Smári Guðjohnsen var aðeins þrettán mínútur að stimpla sig inn í spænska boltann en hann gerði sigurmark Spánar- og Evrópumeistara Barcelona gegn Celta Vigo í 1. umferð spænsku deildarkeppninnar. Mark Eiðs kom tveim mínútum fyrir leikslok en honum var skipt inn á fyrir Ludovic Guily stundar­fjórðungi fyrir leikslok þegar staðan í leiknum var 2-2.

KR í úrslitaleikinn

Það verða KR og Keflavík sem leika til úrslita í Visabikarnum í knattspyrnu, en KR-ingar lögðu Þrótt 1-0 í framlengdum undanúrslitaleik á Laugardalsvelli í kvöld. Það var Skúli Friðgeirsson sem skoraði sigurmark KR þegar skammt var eftir af fyrri hálfleik framlengingarinnar. Hvorugt liðið bauð upp á nein glæsitilþrif í leiknum í kvöld, en úrvalsdeildarliðið stóð uppi sem sigurvegari í lokin.

Govou framlengir við Lyon

Franski landsliðsmaðurinn Sidney Govou hefur framlengt samning sinn við Frakklandsmeistara Lyon til ársins 2008. Govou er 27 ára gamall sóknarmaður og hefur verið í herbúðum Lyon í nær áratug, en nokkur lið í Evrópu höfðu verið að bera víurnar í hann á síðustu vikum, þar á meðal enska liðið Aston Villa.

Framlengt í Laugardalnum

Leikur Þróttar og KR í undanúrslitum Visabikarsins er kominn í framlengingu eftir að hvorugu liði tókst að skora eftir 90 mínútna leik. Fyrri hálfleikur var nokkuð fjörugur, en sá síðari hefur ekki verið sérstaklega mikið fyrir augað.

Genginn í raðir Atalanta

Ítalski framherjinn Christian Vieri hefur gengið frá samningi við lið Atalanta í A-deildinni. Vieri var síðast á mála hjá Sampdoria, en hefur lítið geta spilað undanfarið vegna hnémeiðsla. Hjá Atalanta fær þessi 33 ára gamli fyrrum dýrasti leikmaður heims nokkuð sérstakan samning, því hann spilar fyrir aðeins 1500 evrur á mánuði og fær svo greitt sérstaklega fyrir spilaða leiki og mörk sem hann skorar.

Markalaust á Laugardalsvelli í hálfleik

Nú er kominn hálfleikur í viðureign Þróttar og KR í undanúrslitunum í Visabikarnum, en enn hefur hvorugu liðinu tekist að skora þrátt fyrir fjölda ágætra marktækifæra. Sigurvegarinn í kvöld mætir Keflvíkingum í úrslitaleik keppninnar. Þróttur hefur aldrei náð alla leið í úrslitaleikinn.

Bolton kaupir Írana

Enska úrvalsdeildarfélagið Bolton hefur fest kaup á íranska landsliðsmanninum Andranik Teymourian, en hann er miðjumaður og kemur frá liði í heimalandi sínu. Hann er 23 ára gamall og hefur spilað 11 landsleiki fyrir þjóð sína. Sam Allardyce segir leikmanninn vafalítið eiga eftir að spjara sig í úrvalsdeildinni eftir góða frammistöðu á HM í sumar.

Don Nelson tekinn aftur við liði Golden State

Gamla brýnið Don Nelson er kominn aftur á hliðarlínuna í NBA deildinni eftir stutta fjarveru, en í kvöld verður hann kynntur sem næsti þjálfari Golden State Warriors. Félagið hefur rift samningi við Mike Montgomery og verður undir leiðsögn Nelson á næstu leiktíð. Liðið hefur ekki komist í úrslitakeppnina síðan árið 1994, en þá var Nelson einmitt þjálfari liðsins.

Van Bommel til Bayern

Þýsku meistararnir Bayern Munchen gengu í gær frá kaupum á hollenska landsliðsmanninum Mark Van Bommel frá Evrópumeisturum Barcelona. Kaupverðið er sagt vera um 6 milljónir evra og hefur Van Bommel skrifað undir þriggja ára samning við Bayern. Þar verður honum ætlað að fylla skarð Michael Ballack, en hann verður eflaust óður í að fá að sanna sig eftir að hafa lítið fengið að spila með Barcelona á síðustu leiktíð.

Odonkor til Real Betis

Þýski vængmaðurinn David Odonkor hjá Dortmund gekk í gærkvöld frá fimm ára samningi við spænska liðið Real Betis. Odonkor er 22 ára gamall og vakti nokkra athygli á HM í sumar þar sem hann átti góðar innkomur með landsliði Þjóðverja, en hann var nokkuð óvænt tekinn inn í landsliðshópinn á síðustu stundu af Jurgen Klinsmann.

Petrov vill fara til Aston Villa

Búlgarski landsliðsmaðurinn Stilian Petrov er nú sagður nálægt því að ganga í raðir enska úrvalsdeildarliðsins Aston Villa, en hann hefur lengi óskað eftir því að fá að fara frá skoska félaginu Glasgow Celtic. Petrov er 27 ára gamall og lék undir stjórn Martin O´Neill, núverandi stjóra Villa, þegar hann stýrði Celtic á sínum tíma. Talið er að kaupvirðið yrði um 6 milljónir punda, en umboðsmaður Petrov segir þó að enn sé langt í land með að ná samningum.

Stórtap fyrir Írum

Íslenska karlalandsliðið í körfubolta tapaði illa fyrir Írum 72-54 í lokaleik sínum á æfingamótinu sem haldið var í Írlandi. Þetta var fimmti æfingaleikur íslenska liðsins í röð á stuttum tíma og uppistaðan tveir sigrar í fimm leikjum. Brenton Birmingham var stigahæstur í íslenska liðinu í gær með 13 stig og Jón Arnór Stefánsson skoraði 11 stig.

Keppnum fækkar 2007

Landslagið í Formúlu 1 verður nokkuð breytt á næsta keppnistímabili eftir að ljóst varð að ekki verður keppt í San Marino og þá hefur Evrópukappaksturinn verið strikaður út af sakramentinu. Á móti kemur að staðfest hefur verið að keppni á Spa brautinni í Belgíu verður endurvakin eftir eins árs hlé, þar sem endurbætur voru gerðar á gömlu brautinni.

Agassi neitar að ljúka keppni

Gamla kempan Andre Agassi var nálægt því að leggja spaðann á hilluna í gær þegar hann vann nauman sigur á Andrei Pavel á opna bandaríska meistaramótinu 6-7 (4-7), 7-6 (10-8), 7-6 (8-6) og 6-2. Agassi, sem vann sigur á mótinu árin 1994 og 1999, var aðeins hársbreidd frá því að falla úr keppni en naut góðs stuðnings 23000 áhorfenda í New York og náði að tryggja sér sæti í næstu umferð þar sem hann mætir Marcos Baghdatis.

Norðanliðin keppast um Woodgate

Ensku úrvalsdeildarfélögin Newcastle og Middlesbrough eru nú sögð í kapphlaupi um að reyna að fá fyrrum landsliðsmanninn Jonathan Woodgate að láni frá spænska félaginu Real Madrid. Woodgate hefur átt mjög erfitt uppdráttar vegna meiðsla undanfarin ár, en í gær átti hann fund með forráðamönnum Boro. Síðan er talið að Newcastle hafi blandað sér inn í málið með því að bera víurnar í hann.

Spænskir fjölmiðlar hæla Eiði Smára

Spænskir fjölmiðlar halda vart vatni yfir ljóshærða víkingnum Eiði Smára Guðjohnsen í dag eftir að hann tryggði Barcelona 3-2 sigur á Celta Vigo í opnunarleik Evrópumeistaranna í spænsku deildinni í gærkvöld.

Fer ekki til Celtic

Danski landsliðsmaðurinn Thomas Gravesen mun ekki ganga í raðir skoska liðsins Glasgow Celtic eftir að slitnaði upp úr viðræðum milli hans og forráðamanna félagsins. Talið var víst að Gravesen færi til Celtic, en nú þarf miðjumaðurinn að treysta á að eitthvað af liðunum í ensku úrvalsdeildinni geri honum tilboð fljótlega, því senn líður að lokun félagaskiptagluggans og leikmaðurinn ekki talinn eiga afturkvæmt í herbúðir Real Madrid.

Fer ekki til Manchester United

Nú er endanlega orðið ljóst að enski landsliðsmaðurinn Owen Hargreaves hjá Bayern Munchen verður áfram í herbúðum félagsins og mun ekki fara til Manchester United. Umboðsmaður hans hefur staðfest að enginn möguleiki sé á að leikmaðurinn fái að yfirgefa Bayern, enda hefur stjórnarformaðurinn þar lagt húsið sitt undir þegar hann segir að Hargreaves fari ekki fet - Manchester United verði að snúa sér annað.

Mido kominn aftur til Tottenham

Egypski framherjinn Mido er genginn aftur í raðir Tottenham í ensku úrvalsdeildinni, en hann er nú formlega orðinn leikmaður félagsins eftir að hafa verið tilkynnt að hann væri ekki inni í framtíðarplönum ítalska liðsins Roma. Mido spilaði sem lánsmaður hjá Tottenham á síðustu leiktíð og skoraði 11 mörk í 27 leikjum.