Töltmót á Hornafirði

Opið töltmót verður haldið á Höfn í Hornafirði þann 22. apríl nk. Það er hestamannafélagið Hornfirðingur sem stendur fyrir mótinu í samstarfi við Sparisjóð Hornafjarðar og nágrennis.

Þór í úrvalsdeild

Körfuknattleikslið Þórs frá Þorlákshöfn vann sér í gærkvöldi sæti í Iceland-Express deildinni á næstu leiktíð þegar liðið bar öðru sinni sigurorð af Breiðablik í umspili um laust sæti á meðal þeirra bestu. Lokatölur í gær urðu 65-60 fyrir gestina úr Þorlákshöfn sem fögnuðu gríðarlega í leikslok.

Utah - San Antonio í beinni

Klukkan tvö í nótt verður leikur Utah Jazz og San Antonio Spurs sýndur í beinni útsendingu á NBA TV-rásinni á Digital Ísland. Lið þessi eru á gjörólíkum stað í töflunni, því meistarar San Antonio eru í efsta sæti Vesturdeildarinnar en Utah á litla möguleika á að komast í úrslitakeppnina.

Eins og nýtt lið

Steve Bruce var að vonum kátur með sigur sinna manna á Bolton í ensku úrvalsdeildinni í knattspyrnu í kvöld, en 1-0 sigur liðsins lyfti því af fallsvæðinu í deildinni. Kollegi hans Sam Allardyce var þó skiljanlega ekki jafn hress með niðurstöðuna.

Haukar í vænlegri stöðu

Haukastúlkur eru komnar í afar vænlega stöðu í úrslitarimmunni um Íslandsmeistaratitilinn eftir góðan útisigur á Keflavík 79-77 í æsispennandi öðrum leik liðanna í Keflavík í kvöld. Megan Mahoney skoraði 33 stig í liði Hauka í kvöld og Helena Sverrisdóttir skoraði 21 stig. Hjá Keflavík var Lakiste Barkus yfirburðamaður og skoraði 37 stig. Haukar hafa því unnið tvo fyrstu leikina í einvíginu og geta tryggt sér titilinn á heimavelli sínum í þriðja leiknum á föstudaginn.

Haukar komnir yfir

Haukastúlkur hafa heldur betur tekið sig saman í andlitinu í leiknum gegn Keflavík í úrslitaeinvíginu um Íslandsmeistaratitilinn í körfubolta kvenna. Haukar voru 11 stigum undir í hálfleik, en þegar þriðja leikhluta lauk hafði liðið náð forystu 61-56. Leikurinn fer fram í Keflavík, en nái Haukar að sigra í kvöld getur liðið klárað dæmið á heimavelli sínum á föstudaginn.

Keflavík yfir í hálfleik

Keflavíkurstúlkur hafa yfir 48-34 í hálfleik gegn deildarmeisturum Hauka í öðrum leik liðanna í úrslitaeinvígi Iceland Express-deildar kvenna í körfubolta, en leikurinn fer fram í Keflavík. Lakiste Barkus hefur farið mikinn í liði heimamanna og skoraði 22 stig í fyrri hálfleiknum.

Birmingham úr fallsæti

Lærisveinar Steve Bruce í Birmingham unnu gríðarlega mikilvægan sigur í fallbaráttunni í ensku úrvalsdeildinni í kvöld þegar liðið skellti Bolton á heimavelli sínum 1-0 með marki frá Jiri Jarosik. Sigurinn þýðir að Birmingham hefur lyft sér af fallsvæðinu og því er ljóst að Bruce getur andað léttar í nokkra daga. Tapið er Bolton á hinn bóginn mjög dýrt í baráttunni um sæti í Evrópukeppninni á næstu leiktíð.

Inzaghi skaut Milan í undanúrslitin

Framherjinn knái Filippo Inzaghi skaut lið sitt AC Milan í undanúrslit Meistaradeildarinnar í kvöld þegar Milan lagði franska liðið Lyon 3-1 á heimavelli sínum San Siro. Lyon var með pálmann í höndunum lengst af og flest benti til þess að liðið færi áfram í keppninni á marki skoruðu á útivelli. Inzaghi skoraði sitt annað mark fyrir Milan á 88. mínútu og Shevchenko gerði út um leikinn skömmu síðar eftir að Frakkarnir tjölduðu öllu til að reyna að jafna leikinn og gerðu mistök í vörninni.

Villareal í undanúrslitin

Spænska smáliðið Villareal er komið í undanúrslit Meistaradeildar Evrópu eftir 1-0 sigur á ítalska stórliðinu Inter Milan í kvöld. Það var varnarmaðurinn Rodolfo Arruabarrena sem skoraði sigurmark spænska liðsins í kvöld og því er Villareal komið áfram á marki skoruðu á útivelli.

Villareal komið yfir

Spænska liðið Villareal stendur nú vel að vígi í einvíginu við Inter Milan í Meistaradeildinni því liðið hefur náð forystu 1-0 í síðari leik liðanna á Spáni. Það var Arruabarrena sem skoraði mark heimamanna á 58. mínútu og því er Villareal með pálmann í höndunum með mark skorað á útivelli í fyrri leiknum. Eins og staðan er núna eru því bæði Mílanóliðin á leið úr keppni í Meistaradeildinni.

Kvennatölt Gusts og Landsbankans

Kvennatölt Gusts og Landsbankans verður haldið laugardaginn 8. apríl nk. í reiðhöll Gusts í Glaðheimum í Kópavogi. Mót þessi hafa alla tíð verið mjög vinsæl og er spáð metaðsókn á laugardag. Keppt verður í Opnun flokk, áhugamannaflokk og byrjendaflokk.

Birmingham yfir gegn Bolton

Birmingham hefur yfir 1-0 gegn Bolton í leik kvöldsins í ensku úrvalsdeildinni og er því á góðri leið með að ná sér í mikilvæg stig í fallbaráttunni. Það var Jiri Jarosik sem skoraði mark heimamanna á 37. mínútu.

Jafnt á báðum vígstöðvum

Nú er kominn hálfleikur í leikjunum tveimur sem standa yfir í Meistaradeild Evrópu. Staðan í leik Milan og Lyon á San Siro er enn jöfn 1-1 en ekkert mark hefur verið skorað í leik Villareal og Inter á Spáni.

Lyon jafnaði

Lyon var ekki lengi að svara á San Siro en staðan er orðin 1-1 í leik Milan og Lyon. Það var Diarra sem jafnaði fyrir franska liðið aðeins sex mínútum eftir að Milan komst yfir á 25. mínútu og nú stendur það vel að vígi með mark skorað á útivelli.

Inzaghi kemur Milan yfir

Framherjinn skæði Filippo Inzaghi hefur komið AC Milan yfir gegn Lyon á San Siro í leik liðanna í Meistaradeildinni. Inzaghi skoraði með skalla á 25. mínútu leiksins og því eru Ítalirnir í vænlegri stöðu í einvíginu eftir að fyrri leiknum lauk með markalausu jafntefli. Leikurinn er í beinni útsendingu á Sýn.

Fabregas á góðum batavegi

Arsene Wenger, stjóri Arsenal, er bjartsýnn á að miðjumaðurinn Cesc Fabregas verði klár í byrjunarlið í leiknum gegn Juventus í Meistaradeildinni annað kvöld en telur aðeins 30% líkur á því að varnarmaðurinn Emmanuel Eboue verði í byrjunarliðinu. Fabio Capello segist ekki gráta það að vanti menn í lið Juventus, en fagnar því sérstaklega að endurheimta Pavel Nedved úr leikbanni.

Milan - Lyon í beinni á Sýn

Tveir leikir fara fram í 8-liða úrslitum Meistaradeildar Evrópu í kvöld og verða þeir báðir sýndir í beinni útsendingu á Sýn og Sýn Extra. Leikur Milan og Lyon er í beinni á Sýn og hefst útsending þar klukkan 18:30 og á sama tíma hefst bein útsending frá leik Villareal og Inter á Sýn Extra.

Hasselbaink svartsýnn

Hollenski framherjinn Jimmy Floyd Hasselbaink hjá Middlesbrough er ekki bjartsýnn á að verða boðinn nýr samningur hjá félaginu, en núverandi samningur hins 34 ára gamla leikmanns rennur út í sumar.

Gæðingafimi - Meistaradeild VÍS í hestaíþróttum

Næsta mót fer fram næstkomandi fimmtudagskvöld, 6. apríl í Ölfushöll. Keppt verður í Gæðingafimi. Gæðingafimi er grein með frjálsum æfingum og kallar á alla kosti íslenska gæðingsins til hámarks einkunnar. Sýningin er frjáls innan tímamarka sem eru 3 til 4 mínútur.

Samningur Herberts ekki endurnýjaður

Nú er ljóst að KRingar munu ráða nýjan þjálfara til að taka við úrvalsdeildarliði félagsins næsta vetur því í dag tilkynnti félagið að samningur Herberts Arnarssonar yrði ekki endurnýjaður. Herbert hefur stýrt KR í tvö ár en liðið hefur ekki náð að komast í úrslitin undir hans stjórn.

Flórída háskólameistari

Lið Flórída er bandarískur háskólameistari í körfubolta eftir að liðið vann auðveldan sigur á UCLA í úrslitaleik í nótt 73-57. Flórída-liðið kom nokkuð á óvart í keppninni og vann andstæðinga sína með að meðaltali 16 stiga mun í úrslitaleikjunum. Joakim Noah skoraði 16 stig, hirti 9 fráköst og varði 6 skot fyrir Flórída í úrslitaleiknum.

Barkley, Dumars og Wilkins í heiðurshöllina

Í gær var tilkynnt um nýjustu einstaklingana sem vígðir verða inn í körfuboltaheiðurshöllina í Bandaríkjunum og á meðal þeirra sem komust í gegn voru leikmennirnir Charles Barkley, Joe Dumars og Dominique Wilkins, sem gerðu garðinn frægan í NBA á níunda og tíunda áratugnum.

Hargreaves vonast eftir landsliðssæti

Enski landsliðsmaðurinn Owen Hargreaves hjá þýsku meisturunum Bayern Munchen segist vonast til að vinna sér sæti í HM-hópi Sven-Göran Eriksson í sumar, en Hargreaves hefur átt við þrálát meiðsli að stríða í vetur eins og svo oft áður og á því sætið alls ekki víst eins og margir af ensku leikmönnunum.

Ég get náð liðinu á rétta braut

Gengi Aston Villa hefur ekki verið í samræmi við væntingar stuðningsmanna í vetur og situr liðið sem stendur í fimmta neðsta sæti úrvalsdeildarinnar. David O´Leary viðurkennir að gengi liðsins hafi verið lélegt í vetur, en heldur því staðfastlega fram að hann sé maðurinn til að koma því á rétta braut á ný.

Del Piero verður ekki með Juventus

Ítölsku meistararnir Juventus verða án sóknarmannsins Alessandro del Piero í leiknum gegn Arsenal í Meistaradeildinni annað kvöld, en hann á við meiðsli að stríða á læri og verður því að horfa á leikinn frá hliðarlínunni eins og Patrick Vieira sem tekur út leikbann. Þá hefur Freddy Ljungberg bæst í hóp þeirra sem eru tæpir vegna meiðsla hjá Arsenal.

Tveir leikir í kvöld

Tveir leikir fóru fram í sænsku úrvalsdeildinni í knattspyrnu í kvöld. Helgi Valur Daníelsson spilaði allan tímann með liði sínu Öster sem gerði markalaust jafntefli við Gautaborg og þá gerðu Malmö og Hacken 1-1 jafntefli.

Njarðvíkingar komnir í úrslit

Njarðvíkingar tryggðu sér í kvöld sæti í úrslitum Iceland Express-deildar karla í körfuknattleik þegar liðið lagði KR-inga í vesturbænum 90-85 í sveiflukenndum leik. Njarðvíkingar höfðu yfir í hálfleik 45-42. Njarðvík vann því einvígið 3-1 og mætir annað hvort Keflvíkingum eða Skallagrími í úrslitum.

Skallagrímur knúði fram oddaleik

Skallagrímur vann í kvöld frækinn sigur á Keflavík á heimavelli sínum Fjósinu í Borgarnesi 94-85 og því verður hreinn úrslitaleikur í Keflavík. Heimamenn voru fimm stigum undir fyrir lokaleikhlutann en tóku öll völd á síðustu tíu mínútunum, þar sem Keflvíkingar skoruðu aðeins átta stig.

Jafnt hjá Blackburn og Wigan

Blackburn og Wigan gerðu 1-1 jafntefli í leik kvöldsins í ensku úrvalsdeildinni. Jason Roberts kom gestunum yfir á 52. mínútu, en Shefki Kuqi bjargaði stiginu fyrir heimamenn þegar hann jafnaði metin á 84. mínútu og þar við sat. Blackburn er því enn í sjötta sæti deildarinnar með 53 stig, en Wigan er í því áttunda með 47 stig.

Keflvíkingar yfir eftir þriðja leikhluta

Keflvíkingar hafa fimm stiga forystu gegn Skallagrími í Borgarnesi þegar þriðji leikhluta er lokið og eru því tíu mínútum frá því að tryggja sér sæti í úrslitunum. Í vesturbænum eru Njarðvíkingar í góðri stöðu gegn KR og hafa yfir fyrir lokaleikhlutann.

Keflavík yfir í hálfleik

Keflvíkingar hafa yfir 50-48 í hálfleik gegn Skallagrími í fjórða leik liðanna í undanúrslitaeinvíginu á Íslandsmótinu í körfuknattleik. Í vesturbænum hafa KRingar yfir 45-42 gegn Njarðvík í hálfleik.

Gerir sér vonir um einn eða tvo leiki með Newcastle

Framherjinn Michael Owen segist aðeins gera sér vonir um að ná að spila einn eða tvo af síðustu leikjum Newcastle í vor eftir að setja þurfti nýja skrúfu í fótinn á honum á dögunum í kjölfar ökklabrots um áramótin.

Skallagrímur yfir eftir fyrsta leikhluta

Skallagrímur hefur yfir 23-22 eftir fyrsta leikhluta í fjórða leik liðanna í Borgarnesi í undanúrslitum Íslandsmótsins í körfubolta en leikurinn er í beinni útsendingu á Sýn. Þá hafa Njarðvíkingar yfir 19-16 gegn KR eftir fyrsta leikhlutann í leik þeirra í DHL-höllinni.

Mendieta úr leik

Spænski miðjumaðurinn Gaizka Mendieta hjá Middlesbrough spilar ekki meira með liðinu á leiktíðinni eftir að hann fótbrotnaði á æfingu í dag. Mendieta þarf því að fara í uppskurð og verður frá æfingum í einar 12 vikur. Hann hefur verið einstaklega óheppinn með meiðsli allar götur síðan hann kom til Middlesbrough og ljóst að hins 32 ára gamla leikmanns bíður erfitt verkefni að koma sér í lið Boro á ný.

Federer fær sendiherrastöðu

Tenniskappinn Roger Federer hefur verið útnefndur velgjörðarsendiherra barnahjálpar sameinuðuþjóðanna, en áður hafa kappar á borð við David Beckham hlotið þessa stöðu úr röðum íþróttamanna. Með þessari útnefningu mun Federer leggja hönd á plóginn við ýmis tækifæri til að bæta hag barna sem eiga um sárt að binda víða um heim, en Federer hefur verið mjög duglegur að gefa til góðgerðarmála á ferlinum.

Viðræðum við stuðningsaðila hætt

Í dag slitnaði upp úr viðræðum Manchester United við netfyrirtækið Mansion, en félögin voru komin á fremsta hlunn með að ganga frá auglýsingasamningi upp á 70 milljónir punda og hefðu búningar Manchester United þá prýtt auglýsingar netfyrirtækisins. Forráðamenn Mansion saka knattspyrnufélagið um að hafa leynilega átt í viðræðum við aðra stuðningsaðila á sama tíma og hafa því ákveðið að bakka út úr viðræðunum.

Fabregas og Eboue fara með til Tórínó

Cesc Fabregas og Emmanuel Eboue fara báðir með liði Arsenal til Tórínó þar sem liðið tekur á móti Juventus á miðvikudagskvöldið, en ljóst er að litlar líkur eru á því að þeir verði í liðinu vegna meiðsla. Fabregas fór á kostum í fyrri leiknum gegn Juventus, en þurfti að fara meiddur af velli eftir aðeins 15 mínútur í leik í ensku úrvalsdeildinni um helgina.

Hughes ætlar sér sigur

Einn leikur fer fram í ensku úrvalsdeildinni í knattspyrnu í kvöld þegar Blackburn tekur á móti Wigan á heimavelli sínum Ewood Park. Blackburn er í harðri baráttu um Evrópusæti á næstu leiktíð og hefur liðið verið á mikilli siglingu undanfarið.

Skallagrímur - Keflavík í beinni á Sýn

Fjórða viðureign Skallagríms og Keflavíkur í undanúrslitum Iceland Express-deildar karla í körfubolta verður sýnd í beinni útsendingu á Sýn í kvöld og hefst útsendingin klukkan 19:50. Keflvíkingar hafa yfir 2-1 í einvíginu og geta því tryggt sér sæti í úrslitunum með sigri í kvöld. Þess má geta að fylgst verður með gangi mála í leik KR og Njarðvíkur í útsendingu Sýnar, en sá leikur hefst á sama tíma.

Það vann enginn fyrir kaupinu sínu

Stuart Pearce, stjóri Manchester City var æfareiður eftir tap sinna manna fyrir Middlesbrough í ensku úrvalsdeildinni í gær og sparaði ekki stóru orðin eftir leikinn þegar hann sagði leikinn verstu frammistöðu liðs undir sinni stjórn og sagði engann leikmanna sinna hafa unnið fyrir kaupinu sínu í leiknum.

Við ætlum að láta Arsenal svitna

Tékkneski miðjumaðurinn Pavel Nedved hjá Ítalíumeisturum Juventus segir að Arsenal eigi ekki von á því að verða tekið neinum vettlingatökum í Tórínó á miðvikudagskvöldið þegar liðin mætast í síðari leiknum í 8-liða úrslitum Meistaradeildarinnar, en Arsenal vann fyrri leikinn 2-0 á heimavelli sínum um daginn þar sem tveir leikmanna Juve voru reknir af velli. Nedved var í leikbanni í þeim leik.

Ætlar að ná í stórt nafn í stjórastólinn

Freddy Shepherd, stjórnarformaður Newcastle, segir að félagið ætli að gera allt sem í þess valdi stendur til að ráða stórt nafn í stjórastólinn hjá félaginu í sumar, en Glenn Roader hefur sem kunnugt er sinnt starfinu í afleysingum síðan Graeme Souness var látinn fara á sínum tíma.

Chelsea er að undirbúa samningstilboð

Umboðsmaður franska varnarmannsins William Gallas hjá Englandsmeisturum Chelsea segir að félagið sé nú að undirbúa samningstilboð handa varnarmanninum, sem hefur verið orðaður við mörg af stóru liðunum á meginlandi Evrópu á undanförnum mánuðum. Gallas hefur verið ósáttur við að fá ekki að spila uppáhaldsstöðuna sína á vellinum með Chelsea, en umboðsmaður hans telur að Chelsea muni bjóða honum vænlega framlengingu á næstunni.

Tólf í röð hjá New Jersey

Lið New Jersey Nets hefur heldur betur verið á sigurgöngu í NBA deildinni að undanförnu og í nótt skellti liðið Miami og vann sinn 12. leik í röð. Vince Carter fór á kostum í liði New Jersey og skoraði 43 stig, en Dwayne Wade skoraði 32 stig fyrir Miami.