Lyon ætlar að sigra Real Madrid

Forsvarsmenn frönsku meistaranna í Lyon ætlast til sigurs þegar liðið mætir Real Madrid í Meistaradeild Evrópu annað kvöld, en það eykur vonir Frakkanna að spænska liðið verður án þeirra Zinedine Zidane og Ronaldo í leiknum.

Landsbankinn áfram bakhjarl

Landsbankinn verður bakhjarl efstu deildar karla og kvenna í knattspyrnu. Samningurinn er til næstu fjögurra ára eða til og með til ársins 2009. Samkomulag um áramhaldandi samstarf KSÍ og Landsbankans var undirritað í aðalbanka Landsbankans við Austurstræti í dag. Landsbankinn hefur síðastliðin þrjú ár verið bakhjarl efstu deildar karla og kvenna.

Calcavecchia sigraði í Kanada

Bandaríkjamaðurinn Mark Calcavecchia vann fyrsta sigur sinn í fjögur ár í bandarísku mótaröðinni í golfi þegar hann hrósaði sigri á Opna kanadíska mótinu sem lauk í gærkvöldi. Calcavecchia lék samtals á 275 höggum, fimm undir pari, en landar hans, Ben Crane og Ryan Moore, voru jafnir í öðru sæti aðeins einu höggi á eftir.

Bandaríkin sigruðu í Solheim-bikar

Kvennalið Bandaríkjanna í golfi endurheimti Solheim-bikarinn af Evrópuúrvalinu í gærkvöld. Jafnt var fyrir lokadaginn, 8-8, en bandarísku stúlkurnar voru sterkari og unnu með 15 og hálfum vinningi gegn 12 og hálfum. Þetta var sjötti sigur Bandaríkjanna í Solheim-bikarnum en liðið hefur aldrei tapað á heimavelli.

Shaq lét hnefana tala

Shaquille O´Neal, leikmaður Miami Heat, lét hnefana tala um helgina þegar hann var staddur í veislu í New York ef marka má fréttir úr New York Post í gær. Ölvaður maður er sagður hafa stjakað við konu hans í veislunni, með þeim afleiðingum að hann fékk íturvaxinn hnefa tröllsins í andlitið og stóð skiljanlega ekki upp aftur eftir það.

Ásgeir með tvö í stórsigri Lemgo

Ásgeir Örn Hallgrímsson skoraði tvö mörk fyrir Lemgo þegar liðið kjöldró Nordhorn með 40 mörkum gegn 28 í þýsku úrvalsdeildinni í handbolta í gær. Düsseldorf og Magdeburg skildu jöfn, 30-30, Markús Máni Michaelsson skoraði þrjú mörk fyrir Düsseldorf og sama gerði Sigfús Sigurðsson fyrir Magdeburg.

Barcelona lagði Real Mallorca

Barcelona bar sigurorð af Real Mallorca með tveimur gegn engu í spænsku úrvalsdeildinni í knattspyrnu í gær. Samuel Eto´o skoraði bæði mörk meistaranna gegn sínum gömlu félögum. Celta Vigo, sem vann Real Madrid á laugardag, og Deportivo La Coruna eru efst og jöfn með sex stig eftir tvær umferðir.

Juventust burstaði Empoli

Juventus, Livorno og Udinese eru einu liðin með fullt hús stiga eftir tvær umferðir í ítölsku fyrstu deildinni í knattspyrnu. Juve burstaði Empoli 4-0 í gær. Frakkinn Patrick Viera skoraði fyrsta mark sitt fyrir Juve og landi hans, David Trezeguet, skoraði tvívegis.

Vieira hefur ekki trú á Arsenal

Patrick Vieira, fyrrum leikmaður Arsenal og núverandi leikmaður Juventus á Ítalíu, hefur ekki mikla trú á sínum gömlu félögum í Lundúnum og segist fagna því að eiga miklu betri möguleika á því að vinna Meistaradeildina í röðum þeirra.

Rúlluðu upp Íslandsmeisturunum

Kvennalið Grindavíkur lofar vissulega góðu fyrir veturinn en liðið hefur fengið til sín tvo mjög sterka leikmenn, endurheimt tvær uppaldar stelpur og æft gríðarlega vel undir stjórn nýja þjálfara síns Unndórs Sigurðssonar. Nú síðast vann Grindavík Íslandsmeistaralið Keflavíkur með 24 stiga mun, 70-46, í æfingaleik í Grindavík.

Makaay klár með Bayern

Hollenska markamaskínan Roy Makaay verður í liði Bayern Munchen sem sækir Rapid Vín heim í Meistaradeildinni á miðvikudag. Makaay varð fyrir því óláni að meiðast á hné fyrir nokkru og missti af leik liðsins í þýsku úrvalsdeildinni um helgina.

Reid hefur ekki áhuga á Plymouth

Fyrrum knattspyrnustjórinn Peter Reid segist ekki vera rétti maðurinn til að taka við liði Bjarna Guðjónssonar í ensku fyrstu deildinni, en hann er einn þeirra sem orðaður er við stöðu knattspyrnustjóra félagsins.

Kári og félagar í góðum málum

Kári Árnason lék allan leikinn með Djurgårdens IF sem vann 2-0 sigur á Malmö í sænsku úrvalsdeildinni í kvöld og náði þar með þriggja stiga forskot á toppnum þegar aðeins fimm umferðir eru eftir. Djurgårdens IF hefur 43 stig, þremur stigum meira IFK Göteborg sem gerði markalaust jafntefli í kvöld.

Þrenna frá Marlon Harewood

Marlon Harewood skoraði þrennu í kvöld fyrir West ham í 4-0 sigri á Aston Villa í lokaleik 5. umferðar ensku úrvalsdeildarinnar. Með sigrinum komust nýliðarnir upp í 7. sæti deildarinnar. Harewood skoraði mörkin á 25 mínútna kafla, tvö á stuttum tíma um miðjan fyrri hálfleik og það síðasta á upphafsmínútum þess seinni.

Mæta sænsku meisturunum í dag

Valsstúlkur mæta í dag sænsku meisturunum í Djurgården/Älvsjö í fyrsta leik sínum í 2. umferð í evrópukeppni félagsliða en leikurinn hefst klukkan 18.00 að íslenskum tíma. Sænska liðið er fyrirfram talið það sterkasta í riðlinum og státar auk þess af því að vera á heimavelli í öllum leikjum sínum.

Clijsters vann opna bandaríska

Belgíska tenniskonan Kim Clijsters vann í nótt auðveldan sigur á frönsku stúlkunni Mary Pierce í úrslitaleiknum á opna bandaríska meistaramótinu í tennis í New York. Clijsters sigraði 6-3 og 6-1, en þetta var fyrsti sigur hennar á stórmóti.

Tvöfaldur sigur Hauka

Karla- og kvennalið Hauka gerðu það gott í Evrópukeppninni í handknattleik í gær, en karlaliðið er komið í Meistaradeild Evrópu eftir öruggan sigur á austurríska liðinu Berchem. Kvennaliðið tapaði síðari leik sínum við ítalska liðið Pelplast með sex marka mun ytra, en er samt komið áfram eftir stórsigur í fyrri leiknum.

Tilkynnt um ráðningu Teits til KR

KR-ingar hafa boðað til blaðamannafundar í dag klukkan 13.30 en þar verður tilkynnt um ráðningu á Teiti Þórðarsyni sem þjálfara karlaliðs félagsins.

Mikil spenna á botninum

Næst síðasta umferð Landsbankadeildar karla í knattspyrnu verður háð í dag. Leikirnir byrja klukkan 14. Viðureign Kelfavíkur og Fram verður í beinni útsendingu á Sýn en á meðan leikurinn fer fram verða sýnd atvik úr leikjum FH og Fylkis og Þróttar og Grindavíkur.

Frjálsíþróttamenn ársins

Í gær tilkynnti alþjóða frjálsíþróttasambandið um val sitt á frjálsíþróttamönnum ársins. Það voru langhlauparinn Kenenisa Bekele og stangastökkvarinn Yelena Isinbayeva sem urðu fyrir valinu í karla- og kvennaflokki og þarf það ekki að koma á óvart í ljósi góðrar frammistöðu heimsmetshafanna á árinu.

Del Horno meiddur

Spænski landsliðsmaðurinn Asier del Horno, sem nýverið gekk í raðir Chelsea, meiddist á læri í leiknum við Sunderland í gær og verður ekki með liðinu á næstunni. Jose Mourinho segir að menn verði að sætta sig við að mikið álag í kring um landsleiki verði til þess að menn lendi í meiðslum.

Tindastóll féll úr 2. deild

Tindastóll féll í gær úr 2. deild eftir 1-2 ósigur gegn Leiftri/Dalvík sem þegar var fallið. Reynir Sandgerði og Sindri Hornafirði taka sæti þeirra í 2. deild en Reynir tryggði sér sigur í 3. deild með því að vinna Sindra 4-1 í gær.

Ísland vann Rúmeníu í körfunni

Íslenska landsliðið í körfuknattleik sigraði Rúmena með 80 stigum gegn 72 í Rúmeníu í gær. Magnús Gunnarsson var stigahæstur, skoraði 22 stig þar af 15 í síðari hálfleik. Logi Gunnarsson kom næstur með 13 stig. Íslendingar urðu í öðru sæti í riðlinum á eftir Dönum.

Lokahóf golfara í gær

Íslenskir kylfingar fögnuðu uppskeru ársins 2005 á lokahófi á Broadway í gærkvöldi. Heiðar Davíð Bragason Kili og Ragnhildur Sigurðardóttir, Golfklúbbi Reykjavíkur, hlutu flest stig í Toyota-mótaröð ársins.

Óvænt úrslit á Spáni og Ítalíu

Óvænt úrslit urðu í spænsku 1. deildinni í knattspyrnu í gær þegar Real Madríd tapaði á heimavelli fyrir nýliðum Celta de Vigo. Þá mátti Internazionale þola ósigur gegn Palermo á Ítalíu.

Grétar Rafn spilaði ekki

Grétar Rafn Steinsson lék ekki með AZ Alkmar þegar liðið burstaði Roosendaal 7-0 í hollensku 1. deildinni í gær. Alkmarliðið hefur unnið alla fjóra leiki sína og er í fyrsta sæti með 12 stig.

Lyon leiðir í Frakklandi

Í 1. deild í Frakklandi hefur Lyon forystu eftir 2-1 sigur á Monakó. 21 árs Brasilíumaður, Fred að nafni, lék fyrsta leik sinn fyrir Lyon og skoraði bæði mörk liðsins. Lyon er með 16 stig en Paris St. Germain, sem vann Strassborg 1-0, er í öðru sæti með 13 stig.

Árni og félagar í efsta sæti

Árni Gautur Arason og félagar í Våleringa komust í gær í efsta sæti norsku úrvalsdeildarinnar. Våleringa sigraði Molde 3-1. Viking Stavanger sigraði Noregsmeistarana í Rosenborg 3-2. Daninn Allan Borgvardt kom inn á í lið Vikings þegar staðan var 2-1 fyrir Rosenborg.

Jafnt í Solheim-bikarkeppninni

Staðan í Solheim-bikarkeppni kvenna í golfi er jöfn fyrir síðasta daginn. Úrvalslið Bandaríkjanna jafnaði metin gegn Evrópuúrvalinu í gærkvöldi. Bæði lið eru því með átta vinninga.

Best vill reka Eriksson

Knattspyrnugoðsögnin George Best, sem gerði garðinn frægan hjá Manchester United á sínum tíma, liggur ekki á skoðunum sínum þegar kemur að málum enska landsliðsins í knattspyrnu og segir að reka ætti Eriksson úr starfi hið snarasta.

Áform KR heilluðu Teit

Teitur Þórðarson, nýráðinn þjálfari KR í knattspyrnu, sagði að ekki hefði staðið til að koma strax aftur heim til Íslands, en sagði tilboð KR hafa freistað sín vegna þeirra áætlana sem þeir hafi uppi um uppbyggingarstarf á næstu árum.

Hálfleikur í Landsbankadeildinni

Nú er búið að flauta til hálfleiks í leikjunum fimm sem eru á dagskrá í næst síðustu umferð Landsbankadeildar karla í knattspyrnu. Ekki hafa verið skoruð mörg mörk í leikjunum það sem af er, en það er þó helst sjónvarpsleikur Keflavíkur og Fram sem stendur undir væntingum, en þar er staðan 2-1 fyrir heimamenn.

Jenas vill Evrópusæti

Jermaine Jenas, sem lék sinn fyrsta leik fyrir Tottenham Hotspurs í jafntefli liðsins við Liverpool í gær, segir að liðið eigi raunhæfa möguleika á að ná Meistaradeildarsæti í úrvalsdeildinni í ár.

Benitez vill skerpa sóknina

Rafael Benitez, knattspyrnustjóri Liverpool, er ánægður með leik sinna manna það sem af er leiktíðinni, en segist þó vilja skerpa á sóknarleik liðsins, sem hefur ekki verið upp á marga fiska í undanförnum leikjum.

Dramatík í Landsbankadeildinni

Það gekk á ýmsu í síðari hálfleik í leikjunum fimm í Landsbankadeildinni nú áðan og fjöldi marka leit dagsins ljós á lokamínútunum. Mesta fjörið var á Laugardalsvelli, þar sem Grindvíkingar sóttu Þróttara heim og þurftu á sigri að halda.

Raikkönen sigraði á Spa

Finnski ökuþórinn Kimi Raikkönen heldur enn í vonina um að verða heimsmeistari í Formúlu 1 eftir góðan sigur á Spa brautinni í Belgíu í dag. Félagi hans Juan Pablo Montoya leiddi kappaksturinn lengst af, en lenti í óhappi og þurfti að hætta keppni.

Luque frá í sex vikur

Sóknarmaðurinn Alberto Luque hjá Newcastle verður frá keppni í allt að sex vikur eftir að hann var borin af velli í leik liðsins gegn Fulham í gær, en hann er meiddur á læri.

Bolton og Blackburn skildu jöfn

Nú rétt í þessu lauk sunnudagsleiknum í enska boltanum, en það var viðureign Bolton og Blackburn á Reebok Stadium í Bolton. Leiknum lauk með markalausu jafntefli og fyrir vikið er Bolton í 5. sæti deildarinnar með átta stig úr fimm leikjum, en Blackburn, sem fékk sitt fyrsta stig á útivelli í dag, er með fimm stig í 12. sætinu.

Hartley skaut Hearts á toppinn

Markahrókurinn Paul Hartley skoraði tvívegis þegar lið hans Hearts frá Edinborg lagði botnliði Livingston 4-1 í skosku úrvalsdeildinni í dag og því hefur liðið nú fimm stiga forystu á Glasgow Celtic á toppi úrvalsdeildarinnar þegar sex umferðir hafa verið leiknar.

Gunnar Heiðar tryggði sigurinn

Íslenski landsliðsframherjinn Gunnar Heiðar Þorvaldsson heldur áfram að minna á sig í sænska boltanum, en nú fyrir stundu var að ljúka leik Hacken og Halmstad í sænsku úrvalsdeildinni. Leiknum lauk með 1-0 sigri Halmstad og það var Gunnar Heiðar sem skoraði sigurmarkið á 70. mínútu leiksins.

Auerbach sagður á batavegi

Red Auerbach, forseti Boston Celtics er sagður á batavegi eftir að hann var fluttur þungt haldinn á sjúkrahús fyrir helgina. Fregnir herma að hann hafi verið í dái og verið mjög illa á sig kominn, en nú segir talsmaður Boston að sá gamli sé að ná sér hægt og bítandi.

Geta ekki leikið í New Orleans

George Shinn, eigandi NBA liðs New Orleans Hornets, segir að þó allir myndu helst vilja að liðið léki áfram í borginni, sé það einfaldlega ekki fræðilegur möguleiki. Fjöldi borga í Bandaríkjunum hefur boðið fram aðstoð sína og fljótlega mun liggja fyrir hvar liðið leikur heimaleiki sína í vetur.

Annar stórsigur Vals á Tbilisi

Handknattleikslið Vals var ekki í teljandi vandræðum í síðari leik sínum gegn HC Tbilisi frá Georgíu í EHF bikarnum í dag og rótburstuðu andstæðinga sína aftur, nú með 47 mörkum gegn aðeins 13.

Ronaldo fær frí á miðvikudag

Ungstirnið Cristiano Ronaldo fær frí frá leik Manchester United og Villareal á Spáni á miðvikudagskvöldið, vegna fráfalls föður hans á dögunum. Ronaldo var ekki með liði sínu í jafnteflinu gegn grannaliðinu Manchester City á laugardaginn og Alex Ferguson ætlar að gefa honum lengri tíma til að jafna sig.

Guðjón æfur út í dómara

Guðjón Þórðarson lét dómarann sem dæmdi leik Notts County og Chester City í gær, hafa það óþvegið í viðtali við heimasíðu Notts County eftir leikinn, sem endaði 1-1. Guðjón sagði sorglegt að jafn óreyndur dómari fengi að dæma leiki af þessu tagi.