Taskmaster Ís­land snýr aftur

Fimm vandlega valdir keppendur hafa nú sett sig í stellingar fyrir upptökur á annarri þáttaröð íslensku útgáfunnar af hinum heimsfrægu skemmtiþáttum Taskmaster.

Í Taskmaster Ísland etja fimm íslenskir skemmtikraftar og grínistar kappi í óvæntum og oft furðulegum þrautum sem krefjast útsjónarsemi, hugmyndaauðgi og húmors. Allt er þetta gert í nafni heiðurs og hláturs en einnig til að finna út hver verður hinn eini sanni þrautakóngur þáttaraðarinnar.

Það er sérlega eftirsótt meðal skemmtikrafta og grínista að komast að sem keppandi í þessum vinsælu þáttum. Þeir hófu göngu sína í Bretlandi, hafa síðan farið sigurför um heiminn og eru framleiddir og sýndir í á þriðja tug landa.

Fyrstu keppendurnir verða kynntir til leiks hér á Vísi á morgun. Hægt er að horfa á fyrstu þáttaröðina á streymisveitunni Sýn+ og í opinni dagskrá á Sýn.