Ní­tján ára Frakki þakkaði Lampard fyrir traustið með stór­leik

Cherif var í fyrsta sinn í byrjunarliði hjá Frank Lampard í kvöld, eftir komuna frá Fenerbahce í ágúst, og þakkaði fyrir sig með stórleik.

Hann fiskaði víti eftir aðeins fimm mínútna leik þegar markvörðurinn Lukas Hornicek missti boltann frá sér og braut á honum. Jack Rudoni skoraði af öryggi úr vítinu og var staðan 1-0 í hálfleik.

Í upphafi seinni hálfleiks skoraði Cherif svo sjálfur með mjög góðu skoti eftir langt innkast Coventry-manna.

Sven Botman hleypti spennu í leikinn með frábæru skoti utan teigs á 70. mínútu og Newcastle-menn gerðu sig líklega til að jafna leikinn en Coventry náði aftur tveggja marka forskoti þegar Joelinton missti boltann á skelfilegum stað við eigin vítateig og Ellis Simms skoraði.

Stephen Mfuni bætti svo við fjórða marki heimamanna með glæsiskoti eftir að Brandon Thomas-Asante hafði skömmu áður átt þrumuskot í stöng og út.

Þetta var annar sigur nýliða Coventry sem nú eru með sex stig í 14. sæti, þremur stigum frá fallsæti, en Newcastle er með átta stig í 11. sæti.