Af­gerandi niður­staða um að slíta kjara­samningum

Þetta er niðurstaða stjórnarfundar VR í kjölfar fundar með trúnaðarráði félagsins. Fyrr í kvöld veitti það stjórn VR, og jafnframt samninganefnd þess, óskorað umboð til að segja upp kjarasamningum. Frestur til að segja upp kjarasamningum rennur út síðdegis fimmtudaginn næstkomandi, 8. október.

„Þetta var hörkufundur. Mikil mæting, málin rædd frá ólíkum hliðum, fólk skiptist á skoðunum en það var mjög afgerandi niðurstaða. Ég er með fullt umboð úr mínu félagi,“ segir Halla Gunnarsdóttir að loknum fundi.

Hún segir að afgerandi niðurstaða hafi verið um að slíta kjarasamningum komi ekkert á móti frá Samtökum atvinnulífsins. Allir í stjórn VR hafi greitt atkvæði með því að segja samningunum upp að öllu óbreyttu. 

Félagið sagði í yfirlýsingu fyrr í dag að Samtök atvinnulífsins hefðu ítrekað ekki sýnt viðleitni til þess að mæta stöðu launafólks vegna forsendubrests kjarasamninga.

Hún segist vona að Samtök atvinnulífsins komi til móts við VR en þau eigi fund á morgun. Innan VR sé full samstaða til þess að „rjúfa þennan vítahring“ og áhersla sé lögð á að láta samningana halda.

„Ég held að það væri mikið óráð af Samtökum atvinnulífsins að láta þá [kjarasamninga] springa í loft upp út af ekki stærra ágreiningsmáli en þessu.“

Er einhver von á að afstaða beggja aðila breytist á fundinum á morgun?

„Já, ég bara vona það. Það sem auðvitað reynir á í svona samningaviðræðum er að leyfa sér að hugsa í lausnum og að opna á lausnir sem eru kannski ekki beint fyrir framan nefið á þér akkúrat þegar þú byrjar. Við erum tilbúin til að gera það.“

Nú eru þrír sólarhringar til stefnu þangað til frestur til að segja upp samningum rennur út. Halla segist sannfærð um að lausnin sé til en hins vegar sé alveg skýrt að ef það eigi að „þvinga okkur áfram inn í launalækkanir“ sjái félagið sér ekki fært annað en að segja samningunum upp.