Meiri líkur en minni á að kjara­samningum verði sagt upp

„Akkúrat núna þá tel ég meiri líkur en minni á að við segjum upp kjarasamningum,“ sagði Halla Gunnarsdóttir, formaður VR, um kjarasamninga í Reykjavík síðdegis á Bylgjunni. Greint var frá því í dag að trúnaðarráð VR og stjórn félagsins muni funda kl. 17:30 þar sem farið yrði yfir stöðuna og næstu skref vegna forsendubrests kjarasamninga.

„Það er rosalega alvarlegt fyrir okkur sem stöndum í forystu stéttarfélaga að horfa í augu okkar félagsfólks og segja: Já, þið hafið fengið launalækkanir á tímum gríðarlega hárra stýrivaxta. Og nú ætlum við bara að bíða og sjá og láta ykkur taka aðra eins lækkun núna í hálft annað ár til viðbótar,“ sagði Halla.

Viðtalið við Höllu í heild sinni má sjá hér í spilaranum að neðan. 

VR hafi kynnt ýmsar lausnir fyrir SA. Í dag hafi VR fengið viðbrögð frá SA en Halla segir þau hafa verið staðfestingu á því að samtökin hafi ekki „trú á verkefninu“.

„Í rauninni snýst verkefnið bara um það að launafólk eigi áfram eitt að bera áhættuna, eigi áfram eitt að bera byrðarnar af óvissu í hérna alþjóðamálum og svona væringum í efnahagslífinu á meðan allir aðrir ætla að verða stikkfrí.“

Í yfirlýsingu frá SA fullyrða samtökin að þau hafi staðið að fullu við gerða samninga og kalla forsvarsmennirnir eftir því að umræðan um kjaramálin byggi á staðreyndum og gagnkvæmri virðingu.

Sjá einnig: Hafna ásökunum um svik og benda á stjórnvöld

„SA vilja áfram vinna með verkalýðshreyfingunni og stjórnvöldum að niðurstöðu sem tryggir að samningarnir haldi og stuðlar að varanlegum stöðugleika,“ segir í yfirlýsingunni.

Verði samningunum sagt upp á fimmtudag falli þeir úr gildi 31. október og þá geti opinberu félögin einnig sagt upp samningum kjósi þau að gera það. Ótímabært sé að segja til um verkfallsaðgerðir verði af uppsögnum kjarasamninga en „það verður mikil harka á vinnumarkaði ef þetta verður niðurstaðan,“ segir Halla.