Á­fall fyrir lands­liðið og Söndru sem var borin af velli

Sandra María meiddist í leik með liði sínu Köln gegn Bayern í þýsku 1. deildinni í gær og var borin af velli.

Nú hefur verið greint frá því á miðlum Kölnar að liðþófi í hné Söndru hafi rifnað, hún sé því á leið í aðgerð og verði frá keppni í talsverðan tíma.

Sandra meiddist snemma í seinni hálfleik, eftir að hafa verið að dekka Glódísi Perlu Viggósdóttur í hornspyrnu og spyrnt boltanum í burtu. Strax varð ljóst að eitthvað alvarlegt hefði gerst og mátti sjá að Sandra var í öngum sínum þar sem hún lá í grasinu, áður en hún yfirgaf svo völlinn á börum.

Sandra er ekki ókunn hnémeiðslum en hún sleit aftara krossband í hné í mars 2017 en náði engu að síður að spila með landsliðinu á EM um sumarið.

Bayern vann leikinn 5-2. Þetta var næstsíðasti deildarleikur Kölnar áður en landsleikjahlé tekur við í október en Ísland mætir þá Króatíu í tveimur leikjum, 9. og 13. október. Sigurliðið fer áfram í úrslitaeinvígi um sæti á HM.