Eva Rún og Blær hljóta Barnabóka­verðlaun Guð­rúnar Helga­dóttur

Hildur Björnsdóttir borgarstjóri afhenti Evu og Blæ verðlaunin við hátíðlega athöfn í Höfða. Í dómnefnd verðlaunanna sátu Þorgeir Ólafsson, Ragnheiður Gestsdóttir og Katrín Lilja Jónsdóttir.

Barnabókaverðlaun Guðrúnar Helgadóttur voru stofnuð árið 2018 til heiðurs Guðrúnu Helgadóttur rithöfundi. Verðlaunin eru veitt árlega fyrir óprentað handrit að barna- eða ungmennabók og er markmið þeirra að hvetja til nýsköpunar í íslenskum barnabókmenntum og styðja við höfunda sem skrifa fyrir börn og ungmenni.

Á sjöunda tug handrita bárust í samkeppnina og hafði dómnefndin úr vöndu að ráða. Eftir endurtekinn lestur þeirra handrita sem þóttu skara fram úr varð það einróma niðurstaða dómnefndar að handritið Bestu vinir væri helst til verðlauna fallið. Útgefandi bókarinnar er Bókabeitan og verður henni dreift í verslanir í dag.

Saga sem höfði til barna á miðstigi

Bestu vinir fjallar um dreng og stúlku sem kynnast þegar stúlkan flytur í næsta hús við drenginn. Drengnum líkar ekki við stúlkuna í fyrstu en það breytist þegar hún verður sessunautur hans í skólanum. Saman takast þau á við dularfulla ráðgátu og með ævintýrum þeirra þróast óvænt vinátta. 

Bókin er samstarfsverkefni Evu Rúnar og Blævar, Eva skrifar textann og Blær teiknar myndir og hannar útlit bókarinnar. Þær hafa áður gert saman bækurnar Stúfur og björgunarleiðangurinn, Stúfur fer í sumarfrí, Stúfur leysir ráðgátu og Stúfur hættir að vera jólasveinn.

„Hugmyndin að bókinni kviknaði eftir ótal mörg samtöl við krakka um vináttu og samvinnu í skólaheimsóknum og sögusmiðjunum okkar,“ segja þær og bæta við að þær hafi lagt mikla vinnu á láta texta og myndir spila saman.

Í umsögn dómnefndar kemur fram að sagan sé vel skrifuð á góðu máli sem hæfi aldri væntanlegra lesenda. Sögupersónur séu vel skapaðar og sagan bæði spennandi og skemmtileg. Myndir séu órjúfanlegur hluti verksins og gæða það auknu lífi. 

Sagan höfðar einkum til lesenda á miðstigi grunnskóla og bendir dómnefnd á mikilvægi þess að í boði sé skemmtilegt og aðgengilegt lesefni fyrir börn sem eru að byrja að lesa sjálf og óstudd.