Hera setti Ís­lands­met og Guðni Valur vann tvö kastgull

Hera Christensen varð Íslandsmeistari í kringlukasti á nýju Íslandsmeti en hún kastaði 56,76 metra og sló sitt eigið met.

Gamla met Heru var kast upp á 55,95 metra síðan í ágúst í fyrra en metið náði því ekki að halda upp á eins árs afmælið sitt.

Hera var að tryggja sér þriðja Íslandsmeistaratitil í röð í kringlukasti en hún vann með 46,28 metra kasti 2024 og með 51,82 metra kasti í fyrra.

Guðni Valur Guðnason varð Íslandsmeistari í kúluvarpi karla eftir kast upp á 16,93 metra en hann vann líka kringlukastið með 60,63 metra kasti fyrr í dag.

Þetta var ellefti Íslandsmeistaratitill Guðna í kringlukasti og sá fjórði í kúluvarpi. Hann vann einnig tvöfalt 2019, 2020 og 2022.

Ármenningurinn Karl Sören Theodórsson vann stangarstökk karla með því að fara yfir 4,75 metra, Blikinn Júlía Kristín Jóhannesdóttir vann 100 metra grindarhlaup kvenna á 13,31 sekúndum og FH-ingurinn Irma Gunnarsdóttir vann þrístökk með því að stökkva 13,02 metra.

Blikinn Þorleifur Einar Leifsson vann 110 metra grindarhlaup karla á 14,61 sekúndum og Fjölniskonan Christina Alba Marcus Hafliðadóttir vann 200 metra hlaup kvenna á 24,79 sekúndum.

Kristófer Þorgrímsson vann 200 metra hlaup karla á 21,42 sekúndum en annar var Kolbeinn Höður Gunnarsson á 21,52 sekúndum. Kristófer náði því að hefna fyrir 100 metra hlaupið í gær þegar Kolbeinn vann það með 0,02 sekúndna mun.

FH-ingurinn Íris Anna Skúladóttir vann 5000 metra hlaup kvenna,  Fjölnismaðurinn Davíð Freyr Magnússon vann 5000 metra hlaup karla og liðsfélagi hans Guðjón Dunbar Diaquoi Þorsteinsson vann þrístökk karla.