Ís­lensku strákarnir héldu sigur­göngunni á­fram

Íslensku strákarnir hafa þar með unnið alla fjóra leiki sína í riðlinum en bæði lið voru ósigruð fyrir leikinn. Sætið í átta liða úrslitunum er þó ekki alveg í höfn því Bosníumenn bíða í lokaleiknum og þeir gætu skilið íslensku strákana eftir.

Ísland og Bosnía mætast í lokaumferðinni á morgun og þurfa Bosníumenn að vinna tíu stiga sigur til að koma í veg fyrir að íslenska liðið fari í átta liða úrslitin. Strákarnir þurfa því að tapa stórt til að sitja eftir.

Viktor Jónas Lúðvíksson var með 19 stig og 13 fráköst í leiknum í kvöld, Birgir Leó Halldórsson skoraði 16 stig, Lars Erik Bragason var með 14 stig og Ásmundur Múli Ármannsson skoraði 10 stig, tók 6 fráköst og gaf 7 stoðsendingar. Magnús Dagur Svansson var svo með 9 stig og 12 fráköst.

Íslenska liðið vann fyrsta leikhlutann 25-15 en Portúgalar svöruðu með því að vinna annan leikhlutann með tíu stigum, 27-17. Það var því jafnt í hálfleik. Íslenska liðið var 55-50 yfir þegar tæpar fjórar mínútur voru eftir af þriðja leikhlutanum en þegar ein mínúta var eftir voru Portúgalar komnir sex stigum yfir, 61-55. Ellefu portúgölsk stig í röð á þremur mínútum og staðan gjörbreytt.

Íslensku strákarnir létu það ekki slá sig út af laginu og lönduðu sigrinum á spennuþrungnum lokamínútum.