Leitar enn hunds sem týndist fyrir 38 árum

Þetta kom fram í samtali Eyglóar Önnu Ottesen við blaðamann Vísis en hún er ein þeirra sem eru í Dýrfinnu-teyminu en sjálfboðaliðasamtökin voru stofnuð árið 2022. Samtökin aðstoða við leit að týndum dýrum en auglýst var eftir eiganda hundsins í færslu á Facebook-síðu þeirra fyrir helgi.

„Við erum í rauninni bara að bíða eftir því að við fáum réttu lýsinguna á ólinni,“ segir hún og bætir við að það hafi margir sett sig í samband við þau en að elsta tilkynningin um týndan hund sem þeim var bent á hafi verið þrjátíu og átta ára gömul.

Í Facebook-færslunni sagði að líkaminn væri það langt kominn í niðurbrotsferlinu að hvorki væri hægt að segja til um tegund né lit á feldi með vissu en að áætlað væri að hundurinn væri af meðalstærð.

„Þetta er ekki á svona fjölförnum stað en það var einhver sem rambaði á þetta,“ segir Eygló og bætir við að þau geti með engu móti áætlað hvenær hundurinn fór undan ísnum.

Þau hjá Dýrfinnu hafa þegar athugað með sleðahundafyrirtæki sem heldur úti ferðum þarna á svæðinu yfir veturinn en hundurinn er ekki frá því. Þau hafa líka náð tali af íbúum nærliggjandi bæja og eru engu nær.