Tryggvi upp fyrir Elvar fyrir upp­gjörið á Tenerife

Tryggvi fagnaði sætum sigri með Bilbao Basket gegn Girona í dag, 86-80, og þar með komst Bilbao úr 9. sæti upp fyrir Unicaja og La Laguna Tenerife, nýja liðið hans Elvars, í 7. sæti.

Átta efstu liðin komast í úrslitakeppnina og svo gæti farið að leikur Bilbao og Tenerife í lokaumferðinni á föstudaginn verði hreinn úrslitaleikur um síðasta lausa sætið í úrslitakeppninni.

Liðin eru núna með jafnmarga sigra eða 18, einum sigri meira en Unicaja sem á hins vegar tvo leiki eftir, við Asisa Joventut á þriðjudaginn og svo við Baskonia í lokaumferðinni á föstudaginn.

Ljóst er að tvö af þessum liðum (Bilbao, Tenerife og Unicaja) lenda í 7. og 8. sæti og komast í úrslitakeppnina, þar sem þegar er ljóst að liðið í 8. sæti mun mæta deildarmeisturum Real Madrid.

Tryggvi skoraði sjö stig í dag og hitti úr öllum skotum sínum en þar af voru þrjú af vítalínunni. Hann reif til sín samtals sex fráköst og gaf eina stoðsendingu.

Leikurinn var afar jafn og spennandi. Bilbao var 73-72 undir þegar rúmar fimm mínútur voru eftir en skoraði næstu fimm stig og missti ekki forystuna eftir það.